Лух Авт
Няврэмат пиӆн рупитӆ
Имоӆтыйн Варьёган куртан Нижневартовской районан ма рупатаем щиратн айкеӆат акатман яӊхсам па кутоп ашкуӆа хоща уӆты интернат хотн няврэмат хатӆ сыс ӆаваӆты нэӊат пиӆн уйтантысам па ӆый верӆаӆ эӆты ияха потартсув.
Ин там айкеӆ верам нэӊев нэш Юрий Кылевич Вэлла (Айваседа) — киникайт ханшам ёрн мир поэт шуӊат хиӆы нэ. Щи ураӊан иньщассэм, муй нэм тайӆ.
– Ма нэмем Елена Эдуардовна Василькова (эви щирн, Карымова), там нови туром иӆпия Варьёган куртан Нижневартовской районан щи ёхатсам. Ащем — Эдуард Рахимчанович, аӊкем — Тайна Юрьевна Карымовӊан. Щаӆта па Юрий Кылевич Вэлла (Айваседа) — ӆув, ванта, ма ащикем шуӊат ус.
– Елена Эдуардовна, муй наӊ ащикен шуӊат эӆты тамхатӆ ин ястатыя верытӆан, муй хорасап хатнэху, наӊ нумастэнан, ӆув уӆты-хоӆты щирн ус?
– Муӊ ащикев шуӊат шеӊк мосман тайсэв. Ӆув, ванта, отыя хиӆыӆаӆ пеӆа уӆопсайӆ хуватн иса ус. Рут ёхӆавн катра порайт вуш эӆты ӆув номсаӊ па ун хоята ӆуӊатса. Киникайт па ӆуӊтарат ханшты хатнэху щира ӆув муӊ урӊева ищипа ант тайсэв. Катра, хун ма ӆувеӆ шияӆаӆэм, такан ӆув хощаеӆ хоща хухаӆмаӆам па сапӆ вураӆа нох щи ёшӊаӆамн апаӆмаӆэм, мосаӆтаӆэм.
Щаӆта вутщиӆам потартыя, хоты муӊ айтэӆн унт куртан Варьёган лепн усув.
Ащикем вуӆэт тайс, кашӊ хатӆ сыс ӆый пиӆэӆн волькемас, хуӆ па вой веӆпасӆаты яӊхас па ёӆан ищи арсыр ху хоят верат туӊа щира верас.
– Ма уятӆэм, хоты наӊ айшак классатн унт куртаӊ ашкуӆайн утаӆтысан, щи ашкуӆа хот нынана матты ки ащикен шуӊат пуншиӆымаӆ?
– Юрий Кылевич ӆув хиӆыӆаӆ ураӊан унт куртаӆн ашкуӆа щи тайс. Муӊ па 1996-мет таӆ вуш эӆты па иса 2001-мет таӆ унты, таӆаӊ вет таӆ сыс, щимащ унт куртаӊ ашкуӆайн утаӆтысув. Мет оӆаӊ таӆэвн муӊев утаӆтаты нэӊев ащикев шуӊатн Москва хон вошн мощатыса. Таӆаӊ таӆ ӆув муӊ пиӆэвн ус па рупитас. Щиканща кашӊ таӆ иса арсыр хоятатн утаӆтыман тайсаюв. Ащикев шуӊат кимет муӊев утаӆтаты рущ ики Топаӆвош эваӆт тутлимаӆ. Мет ёхи хащам кемн ӆув Нижневартовск муй Радужный вошатн щимащ хоят канштыя питас. Мосаӆ ястатыя, хоты муӊ ямсыева па вещката арсыр верата щи хоятатн утаӆтасаюв. Аратэӆн иса нийӆкем няврэм щимащ унтан пуншам ашкуӆаева яӊхас. Еша уӆӆы муӊ щи утаӆтаты тахаев айӆтыева етшаптасув.
– Елена Эдуардовна, унт куртаӊ ашкуӆа юпийн наӊ Варьёган кутоп ашкуӆа хотн еӆӆы утаӆтатыя питсан?
– Ма, ванта, хун щи унт куртаӊ ашкуӆаем етшаптасам, аӊкем-ащем ищиты Варьёган курта касаӆсат. Щаӆта кутоп ашкуӆа ун классатн утаӆтатыя питсам.
Яртъяӊмет класс юпийн нумассам Ёмвош педучилищая манты па ун ёхӆамн ант эсаӆсайм. Щиканща 10-мет классэм сохнаптасэм па веӆщи па тахаята манты щиратн масайм. Ёмвоша ёхатсам па мет ай няврэмат хатӆ сыс ӆаваӆты тахайн рупитты нэӊат щира педучилищайн еӆӆы утаӆтатыя питсам. Няӆ таӆ сыс сора мантсат, диплом хоӆамсам па ёхи щи ёхатсам. Щитэмн туп Варьёган куртэм мува пурамсам. Тата йикем пиӆн уйтантсаман па хоттэӆ хоятаӊа щи йисам. Муӊ семьяев хоща хуӆам няврэмие там нови туром иӆпия ёхтас. Ма ӆый пиӆэӆн воӆкемасам. Хун няврэмӆув унашак йисат, айӆтыева манэма рупата канштыя питсам. Оӆаӊ таӆн Варьёган куртаӊ йис пормасат шавиты хотн хотхарат лёхитты нэӊа рупитты вусайм.
– Хун наӊ Варьёган куртаӊ кутоп ашкуӆа-интернат хотн рупатайн масайн?
– Куртаӊ йис пормасат шавиты хотн туп таӆ сыс рупитсам. Щаӆта интернат хотн ӆэтотат каварты тахая рупитты вохсайм. Ищи пораятн ма заочной щирн Челябинск вош педагогической университетн «педагог-психолог» щирн еӆӆы утаӆтысам. Хун щи утаӆтыты тахаем етшаптасэм па диплом нэпек мощатсам, 2017-мет таӆ вуш эӆты интернат хота воспитатель нэӊа вусайм. Унт куртатн энмам ханты па ёрн мир няврэмат пиӆа тамхатӆ вуш унты рупитӆам.
– Муй арат няврэм там ёхи хащам порайн нын интернатн хоща тайӆаты, кен муй ӆаварт ӆый пиӆэӆан наӊена рупиттыя?
– Тамхатӆ муӊ хощаева туп ниӆ няврэм тайӆув. Ма щирэмн, ӆый пиӆэӆн тата рупитты кен па шеӊк умащ. Нумастэмн, ин манэма мосты вер щи мощатсам!
Владимир Енов ханшам потар
Авторы
Лух Авт
Темы