обновлено: 13:03, 15 февраля 2023
Лух Авт
Няӆмет Арктической культурной форум верыӆыса
Курк тыӆась хуӆамхосьяңмет хатаӆ эӆты ветхосьяңмет хатаӆ унты Пулңават вошан няӆмет Арктической культурной форум манас. Хон мув хольмаң пеӆа кат регион эӆты няӆсот моӆтас хоят ёхтыӆыйс.
Ӆув кутэӆан федеральной па региональной органат кусяйт, культура хотатан рупитты па НКО ёх, общественной деятелят па предпринимателят. Ёхтам хоятат культура верат, няврэмат яңхты па утаӆтыты каш хотат, нэпек ӆуңатты тахайт, утаӆтыты сират, проектат эӆты потар тусат.
Дмитрий Артюхов округ кусяев ясаң эӆты: «Яӆап таӆэв муң симась ун культурной уйтантопсайн пуншсэв. Ямал мув тус няврэмӆува нётӆув: яӆап музыкальной ашкуӆайт, нэпек ӆуңатты хотат пуншӆув, нарас юхат ӆутӆув, тус няврэмӆува нётӆув. Ин пианист Денис Мацуев па Россия культура сирн рупитты хоятат пиӆан яӆап проект — Арктической международной музыкальной няврэмат конкурс ӆэсятӆув. Округ культура ураңан сит мет ун нётапса».
Там форуман цифровой нэпек ӆуңатты хотат, музеят имидж, ямальской сувенират па каш хотат еӆӆы рупитты сирӆаӆ потрат па верат пирыман усат. Мойң хоятат ураңан И.С. Шемановский нэмпи музейн, ЯНАО мир ёх нэпек ӆуңатты хотан, ОЦНК каш верты тахайн па региональной Дом ремёсел хотан еңта пасанат, уйтантопсайт, рупитты харат, вантопсайт ӆэсятман усат.
Округ культура департамент куся ху Евгений Колтунов потар эӆты: «Округев ураңан симась форумат шеңк мосӆат. Муң мувева хон мув культура сирн рупитты кусяйт ёхтыӆыӆат, нарас юхат верты фабрикайт па культурной учрежденияйт кутан мосты соглашенияйт ханшӆув. Арсыр проектат ӆэсятты питӆув, туса арыты, якты, вератты инвалид няврэмат ураңан уйтантыты харат пуншӆув».
Уйтантопсайт, еңта пасанат тумпийн ёхтам хоятата Пулңавт вошев, шоши мир па вуӆы ёх уӆапса альса, мастер-классат версайт, эпӆаң ӆэтотан ӆапатсайт, вантты каш ӆэсятса.
Альбина Тырлина ханшам потар
