Лух Авт
Муӊ йи ӆэр эӆты тыйм отат
Там ӆапатан Тюмень вошан «Муӊ йи ӆэр эӆты тыйм отат» нэмпи финно-угорской фестиваль нийӆхусмет пуш ус. Щита кашӊ мув суӊ эӆты там рута питам мират актащсат. Альсат, хоты сахат ӆув мирэӆ уӆ, муй хорпи арат, якат тайӆат. Щи тумпийн тус ёшаӊ хоятат ӆув верам рупатайӆаӆ альсат.
Тамащ уйтантопсайт манты порайн кашӊ мир ӆув уӆапсайӆ, ясӊаӆ, яма па атма манты вераӆ эӆты потар туӆ. Ияха потарман, хоӆ нумасӆат хоты сахат еӆӆы нэрыты мосаӆ. Щит шеӊк ям, ванты щи порайн кашӊ мир ӆув атма питам вераӆ пиӆан ант хащаӆ, па ям вераӆ па миратан лакки туӆа, па па мув суӊатан еӆӆы оӆӊитӆа.
Там уйтантопсая Надым вош эӆты щий «Тови най» ханты мир клуб, «Ясавэй» ур ёх клуб, Надым вош ЦНК хоятат, Надымской филиал «Ямал-потомкам!» Ассоциация хоятат па Антонина Салиндер «Поющий Север» араӊ-якаӊ коллетив эӆты яӊхсат.
Каматса ясаӊ Галина Михайловна Граблевская там фестиваль эӆты ястас: «Финно-угорской фестиваль верам порайн муӊ ханты мир уӆапсаев па мирата альсэв. Мастер-классата ар хоят ёхтыӆыйс, кашӊ хоята умащ ус вантты па утаӆтыты, хоты сахат ханты па ур мир кутан ханшет эватӆайт, ёнтӆайт. Сак каратты щирэв ищи алиӆысэв: сак лопсат, пальщамщакат. Кашӊ мир якиӆыйс, арыӆыйс. Юх эӆты нёхрам анӆаӆ-сунӆаӆ этаӆтыйс. Щи тумпийн кашӊ мир ӆув ӆэтотаӆ пасана омпсыӆыйс. Там уйтантопсайн муӊ па мират кутан ӆухсат уйтсув. Щишан, кашӊ пуш верытӆув яха уйтантыты, кутӆуван утаӆтыты».
Тамащ уйтантопсайт мантыйн кашӊ пуш мосаӆ щий пиӆтащиты. Ванты, щи порайн муӊ ханты мирэв эӆты аршак хоят уятты питаӆ. Щи веран уӆапсаев ант хурӆаӆ па еӆӆы манаӆ.
Аллина Тоярова ханшам потар
Авторы
Лух Авт
Темы