Лух Авт
Ломбовож куртаӊ ху
Там ӆуӊан муӊ «Ханты ясаӊ» редакцияева Ломбовож курт эӆты охаль ху Валерий Владимирович Хозумов мойӊа ёхтыӆыйс. Ма ӆув пиӆэӆан потартмеман уӆапсайӆ эӆты инщассэм.
Оша йис, ӆув лыпат энамты тыӆащ 19-мет хатаӆан 1958-мет таӆн Суматвош район Пупъисум куртан сэма питас, щита энмас. Ащеӆ Владимир Устинович Хозумов Хорампауль курт эӆты ус, антеӆ Елена Константиновна (эви опращ нэмаӆ Юрьева ус) — Межи курт эӆты.
Опращеӆ Устин Викторович Хозумов Воӆаӊ Отечественной ляль порайн Украинской фронтан лялясас. Ёхӆы керӆас, хонӆ кашийс, щаӆта операция верам юпийн хув ант ус, антома йис. Валерий Хозумов потартас: «Ма опращем ант вантсэм. Ломбовож куртаӊ ашкуӆайн утаӆтымеман ма Василий Николаевич Сайнахов па Кузьма Зиновьевич Хозумов па па лялясам хоятат шияӆасам. Щикуш ӆув пиӆэӆан уйтантапсэт ӆэщатсат, туп ӆув ляль верат эӆты ант потартсат».
Ӆув эӆтыӆаӆ оша йис, Хозумов опращ нэм охаль ясаӊ толмащтаты ки, щит хашӊа ай вой.
Ащеӆ хуӆ па вой веӆпасӆас, антеӆ ищи хуӆ веӆпасӆас, еӆӆы охсар энмаӆты тахайн рупитас. Ӆув семьяеӆан вет няврэм ус: Валерий — мет ун, еӆӆы нёмасӊан Саша па Серёжа (антома йисӊан), щаӆта Лёня па Таня.
Ашкуӆа унты Валерий Пупъисум куртан энмас. Катра порайн щит ун курт ус, щита ар хоттэӆ ёх па Саранпауль курт эӆты экспедиция рущ хоятат усат. Щишн Валера ай тэӆан рущ ясаӊ хуӆантас па уйтас. Ӆыв семьяеӆ мисат па ӆоват тайс.
Валера ӆапат таӆа ювмаӆан Ломбовож куртаӊ ашкуӆая нулевой класса утаӆтыты манас. Щи порайн щи куртан ӆапат классап ашкуӆа, утхот, ӆапка, почта, нови тут маты таха па 1930-мет таӆ вуш эӆты «М.И. Калинин» нэмпи колхоз усат. Колхозан ӆоват, мисат па охсарат энмаӆсайт. 1961-мет таӆн щи колхоз Саранпауль куртаӊ колхоз пиӆан ияха каратса. Перестройка порайн щи колхоз йира вуса. Щиты айӆтыена Ломбовож куртаӊ мир па куртата касаӆты питсат.
Валерий ясаӊ щирн, Ломбовож курт пуӊаӆан ӆуӊ куртые ус. Щаӆта хуӆам охаль рут, щит Шешкинат, Албинат па Таратоват ванан Ломбовож куртые омассат.
«Ма юхат, Пётр Ефимович Шешкин вантсам. Ӆув ӆоват эӆты пормасат нёхрыӆйыс. Яма нумӆэм, хоты сахат муӊ, похат, туса вантсув, муй щирн ӆув рупитас. Ӆув Ӆэв куртан кулуп хоща кружок тус. Щи тумпийн ӆув хорат вуты вер самаӊа тайсаӆы. Ма ищи ай хопат, ухӆат, нымӆат, ӆупат па па ун отат верты хошӆам. Щит ма ащем эӆты утаӆтысам», — Валерий Хозумов ястас.
Валерий ащеӆ эӆты охаль мир йис верат, пойкщаты верат яма тайӆаӆы. Там йис хоттэӆ ёх па куртаӊ мир пиӆан Ломбовож курт ӆуӊхата пойкщаты вер ӆэщатаӆ.
Валерий Хозумов Ломбовож куртан ӆапат класс етшаптас, нийӆ класс — Ӆэв куртан, еӆӆы 9-мет классан Светлой куртан утаӆтыйс. 10-мет класса утаӆтыты ант манас. 1978-1980-мет таӆӊанан Москва хон вошан хотат омасты батальонан служитас. «Ӆуӊан 1980-мет таӆн Москва хон вошн Олимпиада ус, туп Ас нопатты тыӆащн служитты верэв сохнас, щишн муӊ имохты ёхи мантсув», — Валерий Владимирович нумаӆмасӆы.
В.В. Хозумов ёхӆы керӆас, имеӊа йис, потартаӆ: «Имем Светлана Николаевна, ӆув Патрасуй куртаӊ нэ, охаль Таратов рут эӆты йиӆ. Мин ашкуӆайн ияха утаӆтысман. Мин няврэм ант тайӆаман, туп апщиӆув па апаӆнэӊӆув энмаӆсаман, ин ӆыв уна йисат».
Валерий Хозумов рут куртаӆан хуӆ веӆпасӆас, еӆӆы ветӆэм таӆ унт вантты щира рупитас, щаӆта нови тут маты тахайн рупитас, щи таха эӆты пенсияя манас. Ин щутщаман хуӆ па вой веӆпасӆаӆ, куртаӊ мир вохаӆ ки, ӆув хопат, ухӆат, нымӆат, ӆупат па па мосты отат вераӆ.
Ёхи хащам артан ӆув Ломбовож курт уӆапса эӆты айкеӆ тус. Оша йис, щита «Шешкинской ӆуӊтапса», «Лыжнёй Андрея», няврэмат ураӊан шоши мир щутщаты харат ӆэщатӆайт. Куртаӊ мир охаль мир емаӊ хатӆат ӆэщатӆат.
Ёмвоша сэмӊаӆаӆ лекщитты ёхтыӆыйс, щи муш эӆты Суматвош район пульницайн тохтурат ош версат па тый китсат.
Щи тумпийн ӆув ястас, «Луима сэрипос» охаль мир газета ӆуӊатты мосман тайӆаӆы.
Людмила Шульгина ханшам потар
Авторы
Лух Авт
Темы