Лух Авт
Ляля китам похӆув ёхи ӆаваӆӆаӆӆув
Ешауӆ Хон мув хуват ун емаң хатӆ постаты питӆув, муй щиран муң хоятӆув Воӆаң Ун Лялян нох питсат. Ин там хатӆатан па щи хорахщет лялясты вер пайтӆат. Хащам сусан Хон мув хуват ёх хоятат лялясты муват пеӆа тусайт. Ӆорвош районэв эӆты ищи айӆат похат мантсат. Таӆ шуп хащам юпийн тухаӆ няврэмӆув щутщаты ёхи эсӆысайт.
Там товийн ма антиӆаӆ-ащиӆаӆ пиӆн уйтантысам па еша потрэмисув. Манам няврэмӆув ёхи йиты юшеӆ хув ураңан Симферополь вош унты туп эсӆысайт. Йи пох антеӆ-ащеӆ щи унты яңхсатан, похиеӆ пиӆан уйтантысңан. Яң хатӆ туп яха усат. Щаӆта щи, похаӆа ёхӆы манты мосаӆ. Кимет пох па, сам ант верытман ёхи унты ёхтыӆыйс. Хоттэӆ мохиӆаӆ пиӆан уйтантыты. Йи ӆапат туп ёӆан ус. Ляль муват пеӆа манмаӆ порайн, шаңкап айкеӆ ёхтам щиран, ащеӆ такӆы манас. Ащеӆ щи порайн унтан веӆпасӆаман ус.
Ӆув пиӆаӆан щутщаты эсӆам похат ищи муң округев ун вошат эӆты, йи номас понман ёхи унты манмеӆ. Яңхмеӆ порайн, кушкепа манты юшеӆ пайӆы ус. Ин уӆты местаеӆа, мосты хатӆ унты ёхӆы ёхтаптысат. Кат пох па йи курт эӆты ёхи манты юшан яха ликапсатан. Лялясты лотатан хоты, кат тахайн уӆӆатан. Щиты яха манман, юшан кен па каш. Пиӆаңа ёхи яңхсатан па ёхӆы пеӆа па манты мосаӆ. Манам похӆув кутан йи пох мевӆ посан юкатса. Кат пох па хоӆна ёхи ант ёхтыӆысңан. Ёхи йиты айкеӆ ёхтыӆыйс па таңха вер па щиран кератса.
Щита уӆты куртатан муваӆ хошам ураңан кур иӆпийн иса йиңк па вощлах. Сопекӆаӆ па патинкайӆаӆ иса ӆоӆңиӆайт. Сораӆты таха антом. Ампар хорпи ун карты хошапат хува мув иӆпия лап лаңкман уӆӆат. Лыпийн норы иты кат ята хомтэпат верман уӆӆайт. Щита оӆӆат. Хотэӆ карты кур тайӆ, ӆэтот кавартӆат, хошмаӆтыӆат. Хуӆ па нёхи ӆэты утӆам похат, еша марэмасайт иса рущ ӆэтот ӆэты. Ёӆта китты посылкаятан па тутӆыӆайт. Посылкайӆаӆ туп юшан шеңк хув уӆӆат. Ӆэваса ӆэтот шук китты кум антом. Йи хот ӆыпийн яң-ветхощъяң хоят уӆ. Ӆуматты сохан маты порайн, тухаӆ сохӆаӆ унат, хой па сохаӆ ермат. Ӆув кутэӆан пелтащӆат, щах ант ки ӆэщаӆаӆ яӆпа маӆайт.
Районэв эӆты китам похӆув хоӆ ар тахаятан уӆӆат. Тухӆат кутӆаӆ ван. Щита округ хуват уӆты няврэмат уйтантыман уӆӆат ки, яха пиӆтащӆат. Хув муван уӆман щимащ хоятэн рут сахат уӆ. Похӆув щита хой юш шавиман ӆойӆ, тухӆат па мув кимаӆ вантыман шушиӆыӆат, хой па нэпек ханшман ёша-кура куща ёх пуңаӆан уӆ.
Ёхи ёхтыӆыйм похат эӆты мохиӆаӆ инщассам, оӆаң сыс аңкармиман муй хорпия йисат. Уйтман щи, моӆхатӆ нэмоӆты ант нумасты энамты ай похиет, там хатӆ шаңкап уна ювам ёх хоятат. Потарты ясаңӆаӆ еша пащиран манӆат. Тур сыйӆаӆ па куӆшака ювмеӆ. Мет аршак машъяйн ӆыпи номас нумасман омасӆат. Щикуш мосаң номас ампа ант рахаӆ. Самен уӆты мувен пеӆа керӆаӆ. Туп Хон мувев па мосаӆ накӆат эӆты шавиты. Рутӆам сыстам турам иӆпийн уӆты ураңан ма щи вохсайм. Щимащ атам вер этты порайн, таңха щиты щи нумасӆа. Сам такан верман щиты щи еӆӆы уӆӆат.
Муң хоты, шоши мувеван уӆты хоятат, ляль мува китам похӆува туп хошам ясаң китты верытӆув. Турам пеӆа пойкащман, кашң хатӆ ӆавӆасӆув. Похиет, таӆаң ёш, таӆаң кур, тумтак уӆаты. Сорашак ёхи ёхтаты.
Газета лопсэв этты еӆпийн ям айкеӆ ёхтас. Хоӆна вошан уӆты йи ханты похие ёхи щутщаты эсаӆса. Яӆап вер этам щиран, ӆув кат ӆапат ёӆан щутщияӆ.
Зоя Куртямова ханшам потар
Авторы
Лух Авт
Темы