Лух Авт
Ляль нох питты ураңан воӆаң нётапса верам ёх нумаӆмиӆӆув
Ун Ляль хувн етшас, туп кашң ханты хотан нумӆа, хоты рут хоятӆаӆ ляля маныӆысат, ляля нётыӆысат. Си хоятат ӆаварт уӆапса тайсат, туп туңа, партам сирн ӆувеӆ тусат. Хун няврэмат, хиӆэт хоттэӆ хоятӆаӆ уӆапсаеӆ шавиман тайӆат, уӆапсаеӆ еӆӆы уӆты питаӆ.
Ун рупата верас
Асов куртан Людмила Алексеевна Михайловна уӆ. Ар няврэмаң семьяйн сэма питас. Ашкуӆайн ветъяң пеӆа йи таӆ рупитас. Няврэмата история па обществознание урокат тус. Ун Ляль нумты ураңан няврэмат пиӆан ун рупата верас: лялян уӆам куртаң хоятӆаӆ эӆты потрат акатсат, арсыр конкурсатан, проектатан кассат. Людмила Алексеевна яңкем таӆ Асов курт ветеранат Совет куся нэңа ус. Лув онтасаӆан куртаӆан Ун Лялян уӆам хоятӆаӆа яӆап кев хар 2019-мет таӆан ӆэсятса.
«Ляль порайн энмам няврэмат» ӆэсятам проектаӆ округеван нох питас. Си проект хуват ляль порайн энмам няврэмат меваӆ посатан ӆэсятсайт па масайт, лялян уӆам кашң хоят хаӆасян кев хоран верса.
Людмила Алексеевна няӆ няврэм энмаӆтас, хоӆ семьяяңат, рупитӆат. Ӆув «Ветеран Ямала», «Ветеран труда» званияйңан тайӆ, «Материнская слава Ямала» меваӆ посан юкантман уӆ.
Ун асев иса нумты питӆэв
Аңкеӆ, ун асеӆ па похаӆ эӆты потар па китас. Потраӆ эӆты: «Тарасов рутӆув эӆты ар хоят ёхи ант ёхтас. Ӆув кутэӆан: Александр Андреевич, Андрей Прокопьевич, Григорий Петрович, Никита Степанович, Павел Васильевич, Павел Данилович. Хоӆ Тарасоват.
Ма ун асем — Лука Семёнович Еприн, Ун Лялян ус. 1909-мет таӆан Ӆоракуртан сэма питас. 1942-мет таӆан унщ тыӆасян Ямало-Ненецкой ОВК эӆты ляля вуса. Рядовоя, 173-мет стрелковой дивизияйн 1313 стрелковой полк хося пошкан орытты хоята ус. 1942-мет таӆан ай тахайт потты тыӆасян дивизияйӆ Анна Иоанновна валан ляляссат. Сталинград вош вуты порайн, западной фронта Казачий Курган 126.7 вутат вуты ураңан, Сталинградской областя Димитровка курт хося китсайт. Таӆаң тыӆась вутатаӆ вуты ант верытсат. Туп си таха эӆты вошаӆ ныса. Казачий Курган лялясты харан округ эӆты катхосьяң хоят лялясман ус. Ар хоят си порайн антома йис. Ун асем па сита паратса. Паратам хоятат хоӆ йи тахайн лоттасайт, кев харан ӆэсятсайт. Сит эӆты «Книга памяти» оӆаң томан, 135-мет нэпек лопасан си вер эӆты ӆуңатты рахаӆ».
Ляль ураңан рупитас
Людмила Алексеевна аңкеӆ эӆты щиты ястас: «Аңкем — Евдокия Лукинична Тазимова. Ӆоровы куртан 1931-мет таӆан сэма питас. Си порайн кашң рупитты хоят ляль ураңан рупитас. Аңкем ай пора эӆты ӆаварт рупата верас. Па нэңат пиӆан торан сэврас, юх ӆэсятсат. Колхозной харатан арсыр сюрнет энмаӆсат. Ляль етшам юпийн «Новый путь» нэмпи колхозан мис пусты нэңа ус. Хун куртан ай няврэмат хатӆ сыс шавиты хот пуншса, ясельной группайн няврэмат шавиман рупитас. Тохи хуӆам тыӆась ӆоват няврэмат тутӆысайт.
Аңкем «Ветеран труда», «Ветеран Ямала», «Труженик тыла» званияйт тайс. «Ун Ляль 55-мет таӆ Победа» па «Ун Ляль 65-мет таӆ Победа», «Материнская слава» медалятан па «Материнская слава» 3-мет степень орденан юкантман ус».
Там порайн лялян уӆты ёх
Аратаӆан Людмила Алексеевна йи эви па хуӆам пох тайӆ, хут хиӆы. Йи похаӆ, ин контракт сирн ляль манты тахайн уӆ. Контракт сирн ихосьяң таӆ служитаӆ. Боевой действий ветерана ӆуңтасман уӆ. Сирия, ДНР па ЛНР спецоперацияятан ус. Ар хорпи командировкая китыӆыса. «Кавказ-2012», «Центр-2015», «Восток-2019» ун ученияятан касас. Ин специальной назначение частян служитаӆ.
Людмила Алексеевна похаӆ «За возвращение Крыма», «За службу в части специального назначения», «За спецоперацию России в Сирии» медалятан, А.В. Суворов меваӆ посан, ван хатӆап тыӆасян 2022-мет таӆан Г.К. Жуков медалян па «Лучший парашютист» значокан юкантман уӆ.
Альбина Тырлина ханшам потар
Авторы
Лух Авт
Темы