Лух Авт
КМНС общинаята ӆоңам ёх актыӆысайт
Ун кер тыӆась хуӆамхосьяңмет хатаӆан Пулңават вошан округ КМНС общинайт па ай форма хозяйствования кусяйт семинар-совещанияя актыӆысайт. Хатаӆ сыс ЯНАО агропромышленной комплекс департамент, сельскохозяйственной кооперация па фермерата нётты кусяйт шоши мир ёх общинаятан рупитты хоятат еңта пасан суран потар тусат: муй сирн рупатаеӆ манаӆ, муй нётапса мосаӆ, муй ям па атом верат таӆ сыс усат, ӆэрапсат, яӆпа этты законан па нётапса охат эӆты хуӆатсат.
Вуӆы ёх па хуӆ веӆты хоятат яӆап верат эӆты потартсайт. Муй хуӆ веӆпасӆаты хоятата ӆаваӆты, округ агропромышленной департамент экономической развитие управление куся нэ Ольга Борисовна Щербина потар тус: «Хуӆ веӆты ёх субсидия охан там таӆ эӆты хуӆ ӆэсятты таха эӆты маты питӆайт. Округеван ихосьяң симась таха. Мет ун — Пулңават вош хуӆ ӆэсятты хот. Общинаята ӆуңтасты хоятат хуӆӆаӆ тохи маты верытӆат. Си еӆпийн субсидия охат департамент эӆты мийӆысайт. Нови хуӆ киӆа ураңан нийӆъяң соӆкувайн сохаптаӆайт. Уӆӆат хуӆат, хойтэт сот хус соӆкува киӆа ураңан шитты верытӆат. Си нэпекат департамент хуват ӆэсятты мосӆат.
Там таӆа субсидия маты сир етшас. Яӆап таӆа субсидия нэпекат там таӆан ван хатӆап тыӆасян ӆэсятты рахаӆ. Хой ӆуң сыс ханшам квота хуват хуӆ мосятты ант верытаӆ, ай тахайт потты тыӆась оӆаңмет хатаӆ унты нэпекат яӆпа ӆэсятты па китты мосӆат. Муң показателят туңа сира ӆэсятӆув па субсидия сохаптаты охат ӆэрапӆув. Ант тарамты маты хуӆӆаӆ сохаптаты охӆаӆ ёхӆы ант вуты ураңан.
Кашң таӆ общинайт аршак хуӆ маты питсат. Муң субсидия охат туп 8500 тонна сахат эсаӆты верытӆув. Хасям таӆан хуӆ веӆты ёх 12500 тонна хуӆ масат. Хоӆся муң си арат ох уӆув сохаптаты ураңан? Округев хуват хуӆ ӆэсятты тахайт туп 6500 тонна хуӆ ӆэсятӆат. Сишан хасям маты хуӆӆаӆ ант мосӆат. Хой аршак сот тонна эӆты хуӆ мосятаӆ, себестоимость сирн па хуӆ ӆутты тахаята маты верытӆат.
2025-мет таӆ унты, общинайн рупитты ёх хоӆ округ хуӆ ӆэсятты тахаятан вантты питӆайт. Сишан, мет каркамшак па ям хуӆат маты хоятат си субсидия охӆаӆ шитӆат».
Семинар-совещанияйн ханты хоятат кутан хуӆам ху Ӆорвош район эӆты ёхтыӆыйс. Сит — Михаил Андреевич Лельхов, Олег Сергеевич Лонгортов па Кузьма Григорьевич Возелов. Ӆув общинайн рупитӆат.
Олег Сергеевич Овкурт эӆты, хуӆ веӆпасӆыман уӆ, каматса ясаң ястас: «Йи рут хоттэӆ «Тэтта рут» общинайн 2016-мет таӆ эӆты рупитӆам. Щаня лепан ӆоратан па ёханан веӆпасӆыӆув. Ӆуңан Муши вош ӆоратан хуӆ веӆман уӆӆув.
Нэпек сирн вет хоят рупитаӆ, уӆӆат хоятат, хой кум тайӆат, рупата договор хуват веӆпасӆыӆат. Квота хуват ма ветъяң тонна хуӆ вуйӆыӆам. Хой кат тонна хуӆ маӆ, бензин пущкайн маӆэм. Си тумпийн ох хоӆна шитӆат.
Хуӆ потӆтаты хошапат туп Мушийн па Овкуртан ӆойӆат. Тохи па моӆтыйн туты мосаӆ. Ин хуӆ веӆпасӆаты хоятат буран маты ураңан грант нэпекат ӆэсятты верытӆат. Туп уятты мосаӆ, хун нэпекат ӆэсятты. Там таӆа нэпекат китты пора хасяс».
Альбина Тырлина ханшам потар
Авторы
Лух Авт
Темы