Лух Авт
Китай хон мув нётом портун
Кат пуращ ики каман потарман омасӆаңан. Ӆын хощаян энамты ики ёхтас. Пуращ икеңан омасӆаңан энамты ики верантты тахайна. Щита мув хоща вальщамат, воңхам ухал курат, кат ухал пар. Етцамеӆ. Энамты ики ухал курӆаӆ нёхартты питас. Пуращ икет ивейна щиящ аңкармиман, ӆын верӆан эваӆт потарӆаңан. Ӆын хощаян кат ёх няврем ёхатсаңан, ӆын хиӆыӆан. Нявремңан варас нёхарты питсаңан, юхал верӆаңан.
И пуращ ики йи икел пела лавас: «Петра, ма меням там хатӆ, кев путаӆ путӆас. Щи кев пут, ма ащем Китай хон мув эвалт ёхтыӆыям икет эваӆт лутыӆымаӆ. Ямас тайса па, хув веритас, тынэсам ики холна талмащ таяс. Щи порайна холна, ям хорамаң анат лутыӆымаӆ».
Петра ики ёсна сар лов вантыман, йи икеӆ пела лавас: «Ма щи порайна нюр энамты усам, веӆащ ның вуйлисам. Ныңем сэңк касаңңи йис. Каман сэпан хоща яңхсам. Щарсат, антас антам ус».
Тарпаӆ па сарна понтсаӆӆы, утлапна лап путрысӆы.
Щи юпина йи икеӆ пела керӆас, па елащ потарты питас: «Щи порайна, имем охал нох аӆамты ант веритас. Веӆащ вуям энамты имием, хоты ӆыӆаӆ нох вуты? Щиты нумасман, самем хосыман, каман тащ хотат хоща яңхсам. И тащ хот хоща па мув эваӆт ёхтам икет ёхатмеӆ. Щи ур хотат хоща тынэсмел. Щащканат, тунат, анат, путат тувмел».
Кимет икеӆ нох нёхлас па аматман Петра ики пела лавас: «Щит иӆампа наң усан, ма нумлэм, нумлэм. Щи порайна ащем пут вус. Ӆув холна талмащ па тайсат, Китай хон мув икет».
Ур хот хоща улты хантэтна инщасам: «Элпен щи атам?»
Петра мояң ёхлаӆ пела талмащмаӆ имеӆ эваӆт. Китай хон мув эваӆт ёхтам йи ики Петра пиӆна ӆув хотаӆна манты лавмаӆ. Талмащаӆ ики пиӆна. Кат икеӆ улам тахаеӆна хищмеӆ. Масайӆаӆ тынымеӆ, вой сохат, сахат, антатра, ӆэпак, ӆаңки, охсар. Щи порайна хантэт ох ант таймеӆ. Китай хон мув эваӆт ёхтам икет пиӆна ёхи ёхатмеӆ. Ӆаптаӆтамат, щи юпина, ның ёхтам икина вантам. Сэмӆаӆ, ёсӆаӆ. Хотащ ӆув щираӆна мосаң сэпан ус?
Китай хон мув эваӆт ёхтам ики лавтаӆ: «Ма итта портун каварӆам. Наң нумасаты, портун ант ки енщаӆ, там мус эваӆт ямми ант йиӆ, ӆыӆаӆ нох вуты ант веритӆа. Енщаӆ ки, ямми йиӆ, туп нявремаӆ эӆты атам питаӆ. Нумасаты».
Энамты Петра лавмаӆ: «Имем туп ӆыӆаң ат ул. Кавартаты портун».
Китай хон мув эваӆт ёхтам ики, хираӆ эваӆт сорам варас нув нох таӆас. Хощ моритмаӆ юпина, равви вермаӆ. Кавармам йиңк хоща тохи парңаӆмаӆ, еса кавармаӆ юпина, сорам лыпат па пом рават тохи понмаӆ. Хув-ван каврас, па потам юпина кеван ӆыпина понмаӆ. Кеван эваӆт ай ан пела понмаӆ. Ӆыр арат йиңк энамты ның эӆты енщты пармаӆ. Портунаӆ енщам. Петра ныңал ямас лоңлаӆ сахна понмаӆ, саңкамты ураңна. Мояң икет ӆаптаӆтамат. Щи юпина, хантэт эӆты па пормасат тынымеӆ, там хантэт ищи вой сох, сахат — лутасмеӆ. Китай хон мув эваӆт ёхтыӆыям икет мантан моса, ӆын портун мийлиман. Ның портун ещтаӆ эваӆт, нох омсыӆыты питмаӆ, ӆытат ӆывмаӆ. Китай икеңан манты питсаңан, портун хийсаңан енщты. Петра ухал кирас, ямас мойӆаптасӆы ёхтам икет, том тащ хотна тохи тусӆы. Ныңал ямми йис. Пораяӆна юхат няврем таяс. Щи нявремаӆ юпина эвет таяс, йикат. Вуӆӆы йисат, эвиӆаӆ ел вусаят, йикаӆ па нявремат таяӆ. Петра охал иӆ эсаӆман омасаӆ.
Йи икеӆ ӆув пелаяӆ лавас: «Хоты верӆа, ямас щи устан, щи арат няврем тайсатан. Йикан ищи хотащ мохиӆаӆна пурщаматаӆна тайӆа. Ёсӆаӆ-курӆаӆ тумтакат, муус ант таяӆ, тарас ант вераӆ, яха щиты щи уллатан, кат ики, ай йикан хотна».
Кимет икеӆ нох лояс, вальщам ракат мольщаңал эваӆт иӆ паркатсаӆӆы. Петра па нох лояс. Вантсаңан еса верантты нявремат пела. Ухал верты энамты ики пиӆна потарсаңан. Аяӆта елащ мантсаңан. Йи икеӆ ӆув хотаӆ пела, Петра ики па ӆув ур хотаӆ пела манас. Щи пораят эваӆт ар пора хищас. Лялят усат, нэңхет тутлисаят. Каӆаңат вуйлисаят, охат этлисат, хонат пиӆтащисат. Каман щир ус, хантэт па улапсы тайты питсат. Тутаң хопат, тохлаң хопат этсат, каман хорпи мутраяң щир. Холна щи порайна нумасты ант веритса, каӆаң юканны курты ухал ӆув щираӆна манаӆ. Щи.
Антонина Сязи (Серасхова) хансам потар
Авторы
Лух Авт
Темы