Лух Авт
Кев сыӆна олты нэңхэт ляль порайна
Касаң нэңхы мув эӆты ӆув олапсэӆ ощтаӆна масӆ. Итта там порайна мув эӆты, лялесам нэңхы сымӆамас. Щи ораңна лялесам нэңхэт муң номтэвна масӆ. Хоты ӆув ропитсат, мала версат, хоты лялессат.
Муң Кев сылна олтытат хоща ляль антам ос. Муң нэңхыӆув там мувна ляль нох питты ораңна вуӆ ям вер версат.
Калаң нэңхэт, хуӆ веӆты нэңхэт па веӆпасӆаты нэңхэт колхоз пела ропитсат. Муң мувувна яртъяң колхоз ропитас. Колхозат ораңна вуӆ вер ропата артаӆасат.
Сэңк щёкат ропата хуӆ веӆты нэңхэт версат. Ӆуват аты-вусы хатӆ ропитсат. Веӆам хуӆӆаӆ мата массат кат вастапсы хуват мувна. Хуӆӆаӆ тутэӆ хуват хощь няхыӆат, кимет па холмет сорты вуӆаят. Понна, коӆна, сохамна, рещина хув сапкен сапек ант тарамтапсы.
Марина Гавриловна Тоболько лаваӆтам щирна муң холсэв, хоты ӆув щёктат ляль порайна осат. Ӆув щи порайна хольёң пела хут таӆаӆ ос. Каӆаңаң нэңхэт пиӆна хуӆ веӆты тахайна Ас хуват китсаят. Ан лавман ки сэңк щёкат ос, ӆув холна хуӆ веӆта ант хассат. Саяп хоты таӆта, щи эваӆт ант ванман, энамты олман па ант хасапсы хоща, планэӆ нох паятсэӆ. Тохал йисна хап ӆыпина халлисат.
Олты хатӆаӆ антам ос, щи порайна олты хат верты комеӆ антам ос. Яхат аса ляльна тувман осат.
Каӆаңаң нэңхэт каӆаңӆаӆ вайна есаӆасаят. Щи порайна каӆаң партон сымаӆ ос. Ар каӆаң щи эваӆт халас. Каӆаң нэңхэт ищи норма ӆытытна мисаят.
Щиты па муң мув тэӆ нэңхыӆув ляль нох питты ораңна вуӆтан нятсат.
Ёхан патты тыӆащна йирхос ветьёң пеӆа и таӆна хуӆ веӆтытат, каӆаң нэңхэт па веӆпас веӆты нэңхэт социалистической вура варты вер вер хоща артащьсат. Округ нох питам нэңхэт хоща кат колхоз нох питас — «Ворошилов» па «Ленин» колхоз.
Сюнзико Тюневич Пандо Чапаев колхозна ропитас. Ӆув мет ям веӆпасӆаты нэңхы ос. Щи ораңна вуӆ майӆапсына маса.
Артаӆам каркам нэңхуйи питас Василий Семенович Пуябри. Ӆув Ворошилов колхозна ропитас. Ляльна мансат кепа, Василий Пуябри энамты нявремат па ныңат эваӆт пирката актас.
Пупта Хавович Пандо — сыяң нэңхы ос. Ӆув хуӆ веӆтытты ос. Товы похолна Кудренской панна наптас. Ӆув ям вер верас. Щи ораңна меваӆ пасна па печатяң нэпекатна майӆыса.
Щиты ропитам нэңху ар. Аса лаваӆты щираӆ антам. Муң ӆувиӆаӆ номлаӆӆув, па порайна па лаваӆӆаӆув.
Щитна муң мувуна Вуӆ Ляль порайна сэңк щёкат ос. Щи порайна сэңк ар колхозна ропитам нэңхэт планӆаӆ токаптасӆаӆ. Аса щи нэңхэт меваӆ посна мийилысаят: «За доблестный труд в период Великой Отечественной войны 1941-1945 гг.».
Ольга Пандо ӆэщатсаӆӆы
Авторы
Лух Авт
Темы