Лух Авт
Кев сыӆ ханты нэӊев мойӆапса шитас
Там ӆапатан хоятата каш верты па хорам вантопсайт ӆэщатты ёх емаӊ хатӆэӆ постасэӆ. Емаӊ хатаӆан каматса хоят Ноябрьск, Новый Уренгой, Пулӊават вошат па Приуральской район эӆты Ямал кущаев нэмпи мойӆапсайн юкантсайт.
Мойӆапса ёша пайтты ураӊан катхощъяӊ хоят нэпекӆаӆ ӆэщатысӆаӆ. Хуӆам номинацияйн няӆ хоят туп пирыса. ӆув кутэӆан Роман Яндо Новый Уренгой эӆты. Тазовской район йис пормасат шавиты хотан рупитты нэ Валерия Гутман. Ноябрьск школа искусств хотан рупитты нэ Светлана Круглова, ӆув няврэмат нарасӆаты па хорамаӊа арыты утаӆтаӆ.
«Изобразительное и декоративно-прикладное искусство» номинацияйн кев сыӆ ханты нэӊев Алла Тайшина мойӆапса шитас. Ӆув эвия уӆмаӆ порайт эӆты ёнтасты, татӆасты, сак каратты утӆас. Утӆам верӆаӆа эвеӆ па хиӆыӆаӆ утаӆтаӆ. Приуральской район уӆты муваӆан ур хот ӆощаӆтаман тайӆ. Ащкуӆая оӆаӊ пуш туты ай няврэмиет, аӊки-ащи эӆты веӆщи хува мантыйн, оӆаӊ сыс щутщаты хатӆатан Алла Тайшина ур хота тутӆыӆайт. Тащ хотатан уӆам няврэмата щиты ванта кеншак ун воша утӆапты. Щи тумпийн ашкуӆайн утаӆтыты па интернатан уӆты уншак няврэмат, вошаӊ па мойӊ хоятат ур хотаӆа иса ёхтыӆыӆат.
Ёхтыӆыты хоятӆаӆа Алла Прокопьевна потартаӆ хоты ханты хоятат уӆӆат, касаӆман яӊхӆат, хуӆ па вой веӆпасӆаӆат, няврэмӆаӆ энмаӆӆат. Муй щиран ур хот ӆэщатӆа, хот ӆыпийн муй хота оӆаӆ, муй хорпи ӆуматты сох ханты хоятат тайӆат, тащ хотан касаӆты порайн маты ухаӆ муй нэм тайӆ. Кашӊ хоятаӆ каврам шайн па хошъйиӊкан йинщӆтаӆӆы. Хуӆ, нёхи, вонщапсайт пасанаӆан иса уӆӆат.
«Ма аӊкием кашӊ пуш арсыр вантопсаята, касты харата пиӆтащияӆ. ӆув ёшаӆан ёнтам сахат, вайт, моӆщаӊат, порхайт, ернасат, ёрн хират, картам сак лопсат, хорамат, сах тэӆ ханшет арсыр вантопсаятан этаӆтаӆайт. Ур хот туты вераӆ эӆты Ёмвошан потар тус. Яр-Сале куртан няр хуӆ верты касапсайн касас. Муй хоӆта щакаӆ, рупатайӆ самаӊа-тусаӊа верман иса оӆаӊ тахаята этаӆ па мойӆапсайт шитаӆ.
Вуӆы сох, нуй па щашкан эӆты ёнтасты манэм па ма эвием утаӆтасӆы. Эвем па похем нарасӆыты па тумранан ёнтты вера хущсаӆӆы. Хоттэӆ касапсайт мантыйн иса манэм нётаӆ. Ма шеӊк аматсам, хун аӊкием тамащ мойӆапсайн юкантса, тумтака ат уӆ, хоӆна ар ханты вер мутраята муӊев утаӆтаӆ», — Яна Максимовна Жежель (Тайшина) эвеӆ потар тус.
Хон Петра вошан «Овс мув нэӊат» мет оӆаӊ форум манмаӆан Алла Прокопьевна «За верность Северу» меваӆ посан юкантса. Там меваӆ пос Овс мув шимӆаӊ мир хоятат Ассоциация Сибири па Дальнего Востока РФ 2009-мет таӆан ӆэщатсэӆ. Овс мув шимӆаӊ мир уӆапса шавиман тайты, еӆӆы туты, хон мувеван уӆты па па хон мув хоятата айкеӆ верты хоятат тамащ меваӆ посан юкантӆайт.
Муӊ па там каркам, тус ёшаӊ нэӊиева мойӆапса ясаӊ китӆув. Таӆаӊ мир ёх ат уятаӆ муй хорпи шимӆаӊа хащам ханты хоятат Овс мувеван уӆӆат, рупитӆат, рут ясаӊан потарӆат па тусаӊа вератты хошӆат.
Зоя Куртямова ханшам потар
Авторы
Лух Авт
Темы