Лух Авт
Каӆаӊаӊ нэӊхэт уйтантыты пора
Надым васна манам каӆаӊаӊ нэӊхэт емаӊ хатӆна Приуральской район команда кимет тахайна этас. Кат хатӆ сыс камантсы хара ёрӆаӆ артаӆаман ертъяӊ очка сытсат. Ловатӆна XXIX-мет каӆаӊаӊ нэӊхэт Ямал мув губернатор Кубок касты хара 170 мет ёраӊ ях яха актащисат. Алаӊ хатӆэӆ тынщаӊ вощкемиман пинтщасэӆ, щита 68 апраӊ нэӊху касас.
«Муӊ касӊ таӆ каӆаӊ нэӊхэт емаӊ хатӆ тынщаӊ вощкемиты касты хар эваӆт пунсӆэв. Мет апраӊ ях кутӆаӆна касӆат, нэмоттыт ялта хыщта ант ӆытӆ, тампус ниӆ нэӊху кутӆаӆна вурая хайсат, ихорпи результат эттасат, щитна ӆув кутӆаӆна молтас па кассат, алӊищ Приуральской район этас», — мет воӆаӊ судья Иван Неркаги лавас.
Кат хатӆ сыс каӆаӊ охална кассат, охал соппы наварсат, юх таӆсат, савлантсат. Касты хара нох питты ораӊна касӊ спортсмен таӆ хуват ӆэщатыйӆ, яхат каӆаӊӆаӆ онттаӆат, ныӊат мет хорам вай па сах йинтӆат, нявремӆаӆ сомматаӆат.
Хой нымаӆна касты вер ки тайӆ, таӆ сыс мет такан нымаӆна яӊхал, ант ӆэщатыман, щёкат олта питӆ.
«Нымаӆна нёхамтыта сэӊк щёкат, муӊ карра иты сэӊк нымаӆна хон яӊхлу, ар пелак ланщ хапна каӆаӊӆу кератӆаӆӆу. Там таӆ ма нэман ӆэщатысам, ощсам нымаӆна нёхамтта питтэм. Ма йи таӆ харты ант номлам, хонты щиты ат нёхамсу, сэӊк ёр соперникат тампус тайсам. Хут нэӊху финиш маса йи кур понман нёхамсу — щитна мет щёкат ос! Кимет таха вусу, щит сэӊк ям результат», — ТСО КМНС «Я ЕРВ» команда касты ях Иван Худи лавас.
Общекомандной зачёт хоща алӊищ МОП «Ярсалинской» команда этас, ТСО КМНС «Харп» холмет таха вус.
Вера Лонгортова хансам потар
Авторы
Лух Авт
Темы