Лух Авт
«Ясңем ищипа хуӆӆа…»
Ун кер тыӆащ хуӆамхощъяңмет хатаӆан Пулңават нэпек ӆуңатты хотан «И всё-таки услышат голос мой…» яңмет уйтантопса манас, Прокопий Ермолаевич Салтыков кащтаса. Уӆмаӆ хуват, там пуш ӆуӆан, ӆув ярсот таӆа йис.
Ас нопатты тыӆащ ветмет хатаӆан «Радио Ямала» рупитты щиран хутъяң таӆ постыйӆ. Округ ӆоват кашң куртан, кашң вошан радио хуӆантам хоятат нумӆэӆ, хоты ханты ясаңан туты передачайн «Вуща уӆаты, ханам ёх па ханам нэңат!» ястам ясңат щащсат. Щит Прокопий Ермолаевич турсыйӆ, мет оӆңа радио хуват ханты па рущ ясаңан потартты радиожурналист, хутхощъяң таӆ щита рупитас.
Ямальской многопрофильной колледжан утаӆтыты няврэмат Нина Михайловна Егерь пиӆан там уйтантопса ӆэщатсэӆ. Ар рупата версат. Прокопий Ермолаевич ханшам ӆуңтарат па потар шупиет ханты, рущ па саран ясаңан ӆуңатсат. Ханты ясаң эӆты рущ ясңа толмащсэӆ. Нёхты хор па вантопса ӆэщатсат. Ӆувеӆ уйтам хоятат пиӆан уйтантысат.
Ханты арат арыты «Овас мувие» нэңат па «Опаль тутые» ай эвиет Прокопий Ермолаевич ханшам па ара понам ӆуңтарӆаӆ арысӆаӆ. Ай эвиет арыман ханты як яксат. «Сорни тутые» хоща нарасӆыты няврэмат Валерий Григорьевич Прыжанков пиӆан нарасӆысат.
Уйтантопсая тэӆые хоят ёхтыӆыйс. Хой ӆув пиӆэӆан рупитас, хой аӆ щиты ӆувеӆ уятсаӆӆы. Ийимеӆ пиӆан энмаӆтам Наташа эвиеӆ па ёхтыӆыйс. Кашң хоят Прокопий Салтыков хошам ясаңан нумаӆмасӆы. Елена Владимировна Сибарева ӆув эӆтэӆ верам нёхты хор вантсув. Евгений Владимирович Озелов мийм рупата хуват радио хоща ханшам турсыйӆ хуӆсэв. Павел Русмиленко ӆувеӆ киноплёнка хора вуйӆысӆы, щи кина шупиенан Прокопий Ермолаевич потартман муң ещаӆтэв шушаӆ.
«Ай уӆмеман радио тумпийн нэмоӆты антом ус. Кашң хатӆ щит хуӆантман, ма нумассам: «Муй хорпи воӆаң хоятат щита рупитӆат». «Ямал» телерадиокомпанияя рупитты ёхатмеман, ма, энамты эвие, ин щи воӆаң хоятӆам пиӆан уйтантсам. Ӆый нэш ищи муң хорпев аӆ хоятат, йи вошан уӆӆув, йи юшат хуват яңхӆув. Ханты, саран па ур ясаңан туты передачайт яң минут туп усат. Веӆщи рупитты ёхтам хоятат щи программайт хуват утаӆтысат. Ма шеңк паӆсам, моӆты мосаң ёвра верӆэм. Прокопий Ермолаевич пиӆан рупитты кен ус. Турсыйӆ шитам, айӆта, ант тэрматыман мин потар ханшсаман па рупатаеман иса туса тыйс», ¬– оӆаң сыс рупитты питам хатӆат эӆты Вера Васильевна Диденко потартас. Ӆув ин там хатӆ унты хоӆна щита рупитаӆ.
Вера Александровна Фёдорова округ санэпидемстанцияйн рупитты куща нэ эвеӆ Константин Салтыков пиӆан утаӆтыйс, ин Тюмень вошан уӆ. Прокопий Ермолаевич эӆты ястаӆ: «Ма Костя ащеӆ еӆта туп вантысэм па рупитты тахайӆ уятсэм. Кашң хатӆ радио хуват ӆувеӆ хуӆантсэм. Ӆув рущ па ханты ясаңан потартас. Ин сэмӆам лап ярӆайт ки ищи па ӆув турсыйӆ моштаӆэм. Ӆуңтарӆаӆ ӆуңаттыйн, матты ки ощхулят, туп ӆый шеңк куӆ номас тайӆат. Рущ ясаңан ӆуңатты ӆуңтарӆаӆ ма ӆыпема ванат усат. Ханты ясаңан потартмаӆан, ма сэмӆам лап пентӆаӆӆам па аӆ хуӆантсам, хоты ӆув ясаңӆаӆ сойм йиңк иты овӆат. Турсыйӆ юраң, хорамаң, ӆэпат. Тухаӆ ишан па каман кащаӆатэман, ай пиращ ики шушаӆ, матты ки иӆ щи ваңклапаӆ. Туп ма иса уятсэм, щит шеңк ям па самаң хоят. Атом хоят тамащ хорам, сам эӆты йиты ӆуңтарат ханшты ант верытаӆ».
Зоя Куртямова ханшам потар
Авторы
Лух Авт
Темы