обновлено: 03:46, 17 февраля 2023
Лух Авт
Ямал мув эӆты уӆты айӆат учёной
Там лопса муң айӆат учёной Виктория Львовна Сязи эӆты потар понӆув. Ӆув 2017-мет таӆн Н.П. Огарёв нэмпи Мордовской государственной университет хоща «Художественная концепция любви в прозе Е.Д. Айпина: национальное своеобразие, система образов» нэмпи ун диссертация нэпекаӆ хоӆапсаӆӆы.
Виктория Ямал мув Пуровской район Тарко-Сале вошан сэма питас. Айтэӆан ӆув Приуральской район Катравош антеӆ рут курта аңкаңкеӆ-ащаращеӆ хоща мойңа яңхиӆыйс. Антеӆ нэмаӆ Евгения. Николай Андреевич Сязи ащаращеӆ — мет яма хуӆ веӆпасӆас, Марфа Яковлевна аңкаңкеӆ вуӆы сох эӆты хорамаң молщаңат, сахат, вайт ёнтас.
– Щита ма ханты ясаң хуӆсам, ӆув манэма шеңк мосас, муң ханты ясңев — ар хорпи. Ёӆан кашң щутщаты хатаӆан антем карты кеӆ хуват аңкаңкем пиӆн ханты ясаңан потартас. 6-7 таӆ ӆоватан ма антем партсэм манэм ханты ясңа утаӆтыты. Ӆув ма пиӆэман ханты щиран потартты питас, нэпекатан ханты ясңат ханшас па хот питар хуват тахартас. Щиты ма айӆтайе рут ясңем утаӆтысэм, ӆуң порайн аңкаңкем-ащаращем пиӆн потартсам, ванты, ӆын рущ ясаңаң щах ант потартсаңан, — Виктория ястас.
Ашкуӆайн ӆув рущ ясаң, литература мосман тайсаӆӆы, туп нэмоӆты порайн ант нумасас еӆӆы муйсыр верат туты питаӆ, хоты ханты литература хуват учёной нэңа йиӆ. Кат таӆ Шадринской государственной педагогической университет «Художественно-графической» факультетан хор ханшты вера утаӆтыйс. Щаӆта еӆӆы заочной щирн Д.И. Менделеев нэмпи государственной педагогической университет хоща па ипуляң Югорской государственной университет хоща утаӆтыты питас. Ӆув щи порайн ханты ясаң па литература вер самаңа тайсаӆӆы.
Ветмет курсан «Лирический герой в произведениях Е.Д. Айпина» нэмпи ун дипломной нэпек ханшас. Ханты мир литературая филологической наукайт кандидат, доцент нэ Елена Викторовна Косинцева щи порайн ӆувиӆаӆ утаӆтас.
2010-мет таӆан Виктория Тупаӆ вошн Д.И. Менделеев нэмпи университет, 2011-мет таӆн — Ёмвошн ЮГУ етшаптас. «Няврэмат арсыр ёш верата утаӆтыты нэ» па «Ясңа утаӆтыты нэ» — кат диплом тайӆ. Нэпекаңа ювмаӆ юпийн ӆув мет оӆңа «Ханнэху па Мув-Ават» нэмпи музей хоща рупитты питас. 2015-мет таӆан Ас-угорской научной института рупитты вохса. Мет оӆаңан экспертной наука щирн утаӆтыты вер туты отдел хоща рупитас. 2017-мет таӆ вуш эӆты ханты па охаль мир литература ӆэрапты отдел кущая йис.
2012-2015-мет таӆатн Виктория ЮГУ хоща аспирантурайн утаӆтымаӆн еӆӆы Еремей Айпин ханшам потрат ӆэрапты питас.
– Ванты, Еремей Данилович шеңк яма па умща потрат ханшаӆ. Ханты мир йис уӆапса ӆув потарӆаӆ эӆты оша пайтты рахаӆ. Хоты мувъйиңк па мувшув каншты ёх муң мувева ёхатмеӆ юпийн хантэта ӆаварта уӆты йис па па мосты верат эӆты. Ветмет курсан утаӆтымеван муң «Река-в-январе» нэмпи потар ӆуңатсув па сочинение ханшсув. Манэма шеңк умща йис, муй щирн ханты ики ийимеӆ самаңа тайӆаӆӆы, щишан еӆӆы щит эӆты ун диссертация нэпек ханшты питсам, — ма пиӆэман потартты нэ ястас.
Ин ӆув научной институтан рупитман ханты мир литература эӆты ун рупата вераӆ.
Муң Виктория Сязи айӆат учёной нэңева ар хошам ясңат китты ӆаңхаӆаюв. Еӆӆы ханты мир йис потрат, монщат, арат, там йис литература эӆты ӆэрамта па научной нэпекат ханша!
Людмила Шульгина ханшам потар
