Иван Иванович Кондыгин Тураман еӆӆы уӆты партса | «Красный Север»
0°C

Лух Авт

Иван Иванович Кондыгин Тураман еӆӆы уӆты партса

Еша уӆ хон мув хоятат ун емаң хатаӆ постаты питӆат, Ун Лялян уӆам хоятӆаӆ нумаӆмиӆат па кев хара лыптат понты яңхӆат. Там лопасан потрэм Иван Иванович Кондыгин эӆты туӆэм. Ӆув Ӆорвош курт эӆты, хольмаң пеӆа хут таӆ уӆмаӆ порайн Ун Ляля вуса.


Вещкат, самаң хоята ус

«Асем шеңк вещкат, самаң хоята ус, ӆув асеӆ хорпи. Ма ун асем хуӆамхосьяң няврэм энмаӆтас. Хун яйӆ антома йис, хоӆна ӆув вет няврэмаӆ вусӆы. Ляль еӆпийн асем колхозан рупитас: хуӆ веӆпасӆыйс, вой мосятыӆыйс.

Асем Ун Ляля туты еӆпийн, Ӆорвош эӆты похаӆ пиӆан хопан Пулңават воша ёхатсаңан. Сиӆта теплоходан Омск воша туса, яң хатаӆ манас. Черёмушки куртан тыӆась утаӆтыты тахайн ус. Кеши па граната ёваӆты, пошкан эӆты орытты утаӆтысайт. Сиӆта Ленинград воша китса», — Ксения Ивановна Канева (Кондыгина) эвеӆ асеӆ эӆты потартас.

Ленинград вош нох паятты порайн

«Ленинград вош оборона хося, оӆаң па кимет Украинской фронт 113-мет стрелковой дивизияйн лялясас, Берлин вош унты ёхтас. Шеңк юраң, каркам, ант паӆтап хоята ус. Ӆохан яма хухатӆыйс, пошкан эӆты яма орытас, сишан разведкая китыӆыса. 1942-мет таӆ эӆты 1943-мет таӆ унты снайпера ус», — эвеӆ нумаӆмийс.

Асем потартыйс, хоты Ленинград вошан ляляссат: «Ситы си хоятат усат: иськийн потсайт, ӆэӆӆы омассат, вур вантсат, ерт, ӆонсь кутан рупитсат. Туп тураман уятса — амуй антома йиӆам, мосаң ӆыӆңа хасьӆам».

«Ленинград вошан асем ям пелак ёшаӆ осколкан хойса. Хуӆам тыӆась госпиталян оӆас. Хоӆна хуӆам тыӆась, ёшаӆ яма йиты унты, ӆован ӆэтот тутӆыйс. Си пора сыс парта пелак ёшан пошкан эӆты орытты утаӆтыйс.

Хоӆна ляль манты тахайн, антома ювам командираӆ юкана ус. Муңева потартыйс, хоты Волховской фронтан рота хося уӆам хоятӆаӆ пиӆан лялясты яңхсат. Уӆты тахайӆ яма уятты мосас, па сира вер ки керӆаӆ сора уйтантыты, каматса хатаӆ ӆэӆӆы уӆты. Верытас, ӆыӆаӆ шависӆы. Ляляӆ Берлин вошан етшас», — эвеӆ ястас.

Муңева потартыйс, хоты Волховской фронтан рота хося уӆам хоятӆаӆ пиӆан лялясты яңхсат. Хор: Галина Кельчина.
Муңева потартыйс, хоты Волховской фронтан рота хося уӆам хоятӆаӆ пиӆан лялясты яңхсат. Хор: Галина Кельчина.

Иван Иванович меваӆ посатан юкатса

Иван Иванович Кондыгин «За оборону Ленинграда» кат медалян 1943-мет па 1944-мет таӆңанан постыман ус. «За отвагу» оӆаң степень меваӆ посан юкатса. Си тумпийн Краков штурм ураңан, Эстония па Чехословакия эӆты немсят нюхаӆты ураңан, правительственной мойӆапсайн постаса.

Советской Союз маршал Константин Константинович Рокоссовский ям ясаңан нумаӆмисӆы. Ун похаӆ 1946-мет таӆан сэма питас, маршал нэман понтсаӆӆы.

Ун Ляль юпийн

Ун ляль етшам юпийн Иван Иванович Кондыгин Ӆорвоша ёхтас, хуӆ веӆпасӆыман ус. Яма вой веӆпасӆаты, хуӆ мосятты па план тэкаптаты ураңан Почётный грамотаятан постаман ус. Хун ийимеӆ антома йис, утся хут няврэм энмаӆтас.

Няврэмӆаӆ хоӆ ям хоята йисат па там хатаӆ унты асеӆ нумман тайӆэӆ. Ун Ляль емаң хатаӆан нумаӆмиман пасан опсыӆыты па няврэмӆаӆа, хиӆыӆаӆа ун асеӆ эӆты иса потарты питӆат.

Альбина Тырлина ханшам потар


0

0

0

0

0

0



Темы