Лух Авт
Интернатаң няврэмат верты пормасат
Овкуртан утаӆтыты порайн тухаӆ няврэмат интернатан уӆӆат. Екатерина Ильинична Терентьева па Олеся Павловна Тыликова ветмет группайн уӆты няврэмат хоща воспитателя рупитӆаңан.
Няврэмат хатӆ шуп утаӆтыӆат, щи юпийн па хой касты хота манаӆ, хой ӆохан хухатӆыйӆ, хой па аӆ каман ёнтаӆ. Тухаӆ няврэмат па Зинаида Петровна Дмитриева хоща ёнтасты па сэвты кружока ёхатӆат. Эвет аматман тохи вератты яңхӆат. Щита нуй хират, каврам пут катаӆты посат, аканят, сак ӆытоват ёнтӆат. Сак паӆат, саклакат па тутхотат сак эӆты каратӆат. Ашкуӆа пуншам порайн ёхтам мойң хоятата мойӆаты няврэмат «Сынский сувенир» версат.
Эвет пиӆан хоӆна йи пох яңхаӆ — щит Никита Артанзеев, ӆув сохам эӆты шашкеӆат сэваӆ. Шаш кеӆӆаӆ шеңк туса по хорамаңа тыйӆат.
Интернатан рупитты нэңат щита уӆты няврэмӆаӆ ай тэӆан утаӆтаӆӆаӆ моӆты вератты, ёнтасты, сохам эӆты сэвты. Уӆты хотхулӆаӆн верам хорамӆаӆ вантты щира нох тахарӆайт. Антиӆаӆ-ащиӆаӆ интерната ёхтыӆыты порайн вантӆат, муй хошӆат ӆув няврэмӆаӆ верты. Муй па яӆап вер верты утаӆтысат.
Муй хорпи вантопсайт уӆӆыӆат, няврэмат верам рупатайт иса тохи мийӆыӆайт. Няврэмат мойӆапса нэпекатан мойӆаӆайт.
Зоя Куртямова ханшам потар
Авторы
Лух Авт
Темы