обновлено: 03:41, 17 мая 2023
Лух Авт
Хоттэӆ ёх емаң хатӆ постаса
Ас нопатты тыӆащ ветхощъяңмет хатаӆан Хон мув хуват хоттэӆ ёх емаң хатӆ постаса. Округеван щи хатӆ кеша нийӆ семья охаң па мойӆапса нэпекатан юкантсайт.
Касапсая китыӆыйм хольмаң пеӆа кат заявка кутан Ӆорвош районэв эӆты «Ветъяң таӆ яха уӆам имеңан-икеңан» номинацияйн — Коневат нох питсат, Пулңават вошан «Арыты, якты па вератты семья» номинация хоща Рыбины хоттэӆ мойӆапса шитас. Мойӆапса вер етшам юпийн Елена Александровна Рыбина пиӆн уйтантысам па еша потрэмасман.
«Ма 2019-мет таӆан тамащ конкурсан касты вутщисам. Щи порайн «Ар няврэм тайты хоттэӆ» номинацияя нэпекӆам ӆэщатысӆам. Туп тохи муң ант ӆэщаӆасув. Тампуш па няврэмӆам утаӆтыты ашкуӆа эӆты ходатайство нэпекан ханшсаюв па заявка маты парсайм. Манэм туп нэпекӆам акатты па мосты щира ӆэщатты мосас. Ашкуӆайн уятӆат, хоты ма няврэмӆам пиӆн арсыр конкурсатан касӆув па мойӆапса нэпекат шитӆув», — Елена Александровна ястас.
2017-мет таӆан ӆув няврэмӆаӆ па хоӆна каматса эви пиӆан ханты арат арыты «Тут суӆтам» ханты фольклорной коллектив актас. Вошаң хоятат ещаӆ, ашкуӆаятан, ай няврэмат хатӆ сыс шавиты хотатан, ванан уӆты ай куртатан няврэмат пиӆн каш верман иса яңхсат. 2019-мет таӆан Елена Александровна «Душа народа моего» Всероссийской конкурса заявка мас па няврэмӆаӆ Хон воша тутӆысӆы. Вет номинацияйн касман 1,2,3 местайт шитсат. 2022-мет таӆан «Душа тундры» этнофестивалян оӆаң местая этсат. Щи юпийн Международной выставка-ярмарка «Сокровища Севера. Мастера и художники России» Москва воша китсайт, щита кимет тахая питсат. Щи тумпийн Зинаида Викторовна Лонгортова верам рупатайт хоща няврэмӆаӆ па ёнтсат. Йис уӆапса эӆты верам спектакль хоща «Крепость «Эвет сойм» — Девичий ручей» па оӆаң ханты кинайн «Хон юш. Путь по Оби» нёхты хор вуты порайн ун хоятат кеман рупитсат.
Похаӆ па эвеңаӆаӆ утаӆтыты тумпийн па рущ ясаңан касапсайт хоща рупатайт верман иса кум шитӆат, ханты ясаңан арат утаӆтыты па арыты, ёнтты, якты па касты тахаята яңхты. Вошан энмам няврэмат ант еӆэмаман ханты сох ӆуматӆат, рут ясңеӆ утаӆтыӆат.
Касты верат уӆӆытэӆ порайн Елена ищи ӆув сак эӆты картам хорамӆаӆ па ёнтам сохӆаӆ вантопсаятан альман оӆаң местаята этӆыйӆ.
«Мет ям хоттэӆ мохет муң округеван уӆӆат. Кашң таӆ касты вер хоща овс мувев эӆты матты семья ищи па па регионат кутан нох питаӆ. Няврэмӆын яма энмаӆман, каркама рупитӆаты, щаӆта каш верты па кум шитӆаты. Щиты уӆапсайн еӆӆы тувман, ин энамты няврэмата, нын шеңк ям вер альӆаты!» ¬– хоятат нётты па шавиты ЯНАО департамент куща нэ Оксана Медынская мойӆапса ясңаӆан щиты ястас.
Там ӆуңан «Ар няврэм тайты хоттэӆ», «Айӆат хоттэӆ», «Ветъяң таӆ яха уӆам имеңан-икеңан», «Йи вер туты хоттэӆ мохет» номинацияйн нох питам хоятат па мув суңатан нох питам мохет пиӆн еӆӆы касӆат.
Округеван хуӆамсот нийӆъяң вет семья яң таӆ сыс хоттэӆ ишакты веран кассат. Ветъяң няӆ хоттэӆ лауреат нэман юкантсайт.
Зоя Куртямова ханшам потар
