Лух Авт
Хащам рупатаем пеӆа самем ищи па хошийӆ
Ӆорвош районан тащан рупитты ёх емаң хатаӆан Владимир Егорович Максаров пиӆан уйтантысам. Ӆув муйкем ӆувеӆ нумӆаӆӆы, ай тэӆан тащ хотан энмас, рупитас, ин няврэмӆаӆ нётман каӆаң хотан яңхаӆ. Антеӆ-ащеӆ уна ювман юпийн, нык охаӆсатан, хуӆ веӆман рупитсаңан.
Рупитам вераӆ похңаӆаӆан еӆӆы туӆа. Николай па Василий «Горковской совхоз» хуӆмет бригадайн рупитӆаңан. Ун похаӆ хоттэӆаң, ай похаӆ хоӆна пиӆ ант тайӆ. Потартмеман инщассэм, хоты ин каӆаң хотан энамты ёх рупитаӆ.
«Ма пенсияя манмем юпийн хоӆна яң таӆ каӆаң хотан рупитсам, ин няврэмӆам пиӆан уӆӆам. Катра щир эӆты ин рупитты кеншак. Еӆпи щахар унты ӆохан манӆа. Ин няврэмат «Бурана» ӆэӆапӆат. Ӆуңан па квадроцикл тайӆат. Муң хоты куран шушсув. Техника, щит хоты ям, туп бензинаӆ шеңк тынаң. Там йис каӆаңат машина сый хуӆман ант паканӆат, утаӆман уӆӆат. Щаӆта па машинайн яңхман, тэрматыман, няврэмат тупан ӆуматӆыӆат. Рущ хоптан па сопек, щит муй хошам тайӆ.
Хошам муватан унтат ёссайт па унт войт сай каншман тыеӆ йиӆат. Хащам таӆатан ур катет па ӆоӆмахат ара ювмеӆ. Тащ юпийн йиӆат. Вуӆы порты вой па ликмиӆыйӆ, щитат хоты техникайн нюхаӆӆайт. Ин па ястаӆат, ур ёх муватан яӆап муш этас, ампӆаӆ, каӆаңӆаӆ хаӆты питмеӆ. Уңаӆӆаӆ няваран эттэӆ. Там ванан потартты хошап хуват щиеӆ ясаң версув, ястаӆат уколан понты питсайт.
Муң ӆуңан тохи вуншӆув, Кев тум пелка. Ур ёх тащӆаӆ па щита уӆӆат. Щита щи каӆаңӆаӆ рыйты питмеӆ, щит яӆап муш, рущатна хоӆна ант уятӆа. Ешауӆ тый ёхатты верытаӆ. Рущат ӆый артаӆаӆэӆ, пора хува ант хайман войт портунан понӆайт ки, мосаң вер туңмаӆ. Тащ шавиты ёхӆама ищи па хурыман уӆты мосаӆ. Войӆаӆ вантман ат тайӆаӆӆаӆ.
Каӆаң хотан рупитты хоятат яма ат рупитӆат, касаӆты юшӆаӆ пайӆы па туңат, хоттэӆ хоятӆаӆ тумтак, кутӆаӆан иса нётасман ат уӆӆат», — щиты Владимир Егорович ястас.
Зоя Куртямова ханшам потар
Авторы
Лух Авт
Темы