Лух Авт
Ханты мира мосты айкеӆат
Там хатаӆ Ямал ӆоватан айкеӆ каншты, ханшты хоятат емаң хатӆ постаӆат. Хольмаң пеӆа хуӆам таӆа йис, хоты ханты мир ӆув рут ясңеӆан ханшам «Ӆух Авт» газета кашң ӆапат ӆуңатты верытӆат.
Каматса хоят инщассам, хоты ӆув нумасӆат, рут ясаңан мосаӆ ханшты па потарты, муй па рущ ясңеӆ тармаӆ? Ванты муңева ищи мосаӆ уйтты, мата юш хуват хатты.
Муя ханты ясаң мосмаңа тайты мосаӆ, щит эӆты Людмила Гурьева (Шульгина) айкеӆ верас: «Хунты 1957-мет таӆн ханты мир писатель ху Григорий Дмитриевич Лазарев «Ленин пант хуват» (ин «Ханты ясаң») ханты ясаңан газета ӆэщатам порайн ястас: «Кашң мира рут ясаңан айкеӆат уйтты мосӆ, щишн газетайт верты мосӆ!» Ванты, газета мохты муң йис потрат, моньщат, арат ӆуңатӆув па оша пайтӆув, муй щирн муң мирэв йистэӆн ус, айкеӆат эӆты — там пора уӆапсаев эӆты оша верӆув.
Шеңк ям — ин «Ханты ясаң» па «Ӆух Авт» газетайңаӆув Интернет мохты ӆуңатты рахӆ. Щиты анта туп Россия мувев арсыр мират, па хон пелак муват уӆты мират муң уӆапсаев эӆты оша верӆат, муң ханты ясңев утаӆтыӆат, ӆэрамтӆат. Ин «Ханты ясаң» газетаев ӆуңатты тумпийн хуӆантты рахӆ. Еша уӆ, мосаң, ханты ясаңан ай кинайт верты питӆув».
Ин ляляң ята питман уӆӆув, ханты похӆув ищи лялясӆат. Щи веран Михаил Толба ищи каматса ясаң ястас: «Ма ай похем ин СВО хоща уӆ. Телефон хуват воӆаң потартыты ант верытӆув. Верытӆув ки, арпелак ханты ясаңан потартӆув, ханя ураңан. «Ӆух Авт» газетайн ёхтыӆытэван, рутӆув хорӆув ки кащаӆаӆӆув, похева китыӆыӆӆув. Щи веран ханты ясңаӆ ант ёрэмаӆӆы».
Ханты ясаң няврэматан яма уйтты ураңан, Татьяна Тоярова щиты ястас: «Туняӆ нын конкурс «Ма ясңем юраң па тащаң» верыӆысты. Няврэмат шеңк аматсат, потарӆаӆ па хорӆаӆ китты верытсат. Еӆӆы ищи щиты верыӆыты мосаӆ. Щи порайн ӆув рут ясңеӆ пеӆа самӆаӆ таӆты питӆайт».
Аллина Тоярова ханшам потар
Авторы
Лух Авт
Темы