Лух Авт
Рупатайӆ эӆты потартас
Ёхи хащам порайн муӊ шоши мирӆув ураӊан сыр-сыр емаӊ хатӆат кашӊ пуш ӆэщатты па верты питсайт. Щи отат манты порайн хантэт, охалят, ёрнат муй саранат арсыр па муват эӆты ӆый хощаеӆ ёхтыӆыты мойӊ ёхата-нэӊата ванӆтаӆат, муйсыр хорамаӊ ӆуматты сохат тайӆат, пормасат верӆат, муйсыр ӆэтотат каварты щират уйтӆат па якты-арыты хотат касты щиратн па верӆат.
Имоӆты щимащ «Ма Ӆорвош мувем» емаӊ хатаӆн Мужи вошн рупата щирн усам, Касом-Нёӆ куртые эӆты щий ёхтам ханты пормасат верты нэ Изольда Петровна Сорокина (Чубахова) пиӆн ияха уйтантысман па потрэмисман.
– Изольда Петровна, мата тахайн наӊ сэма питсан па муйсыр хоттэӆ хоятат кутн усан, айтэӆн энампсан па хота там ёхи хащам пораятн еӆӆы рупитӆан?
– Ма Касом-Нёӆ куртан Ӆорвош район мувн ханты хоттэӆ хоятат кутн сэма питсам, айтэӆн щита усам па энампсам. Муӊ щемьяевн, ванта, аратэӆн ӆапат няврэм ус. Мет ай апщев антома йис. Фёдор яйм ин пенсияйн щутщаӆ па, ма итэма, ищиты Касом-Нёӆн хащас. Ун опем Пенза вошан уӆты-хоӆты щир ӆэщатас. Кимет опем Орехово-Зуево вошн уӆ. Хуӆмет опем Тарко-Сале вошн няврэмат утаӆтыман рупитӆ. Хащам хоятӆам па тата уӆӆат. Касом-Нёӆ куртэвн катра няӆмет классат вуш унты ай ашкуӆа тайсув. Мет оӆаӊан иса щи тахайн ма няврэмат утаӆтыман рупитсам. Юхатшак ӆув ун кущаятн лап тухартса. Щиӊанща, щи вуш эӆты, ма куртаӊ щутщаты хот кущая понтсайм. Ин, аӆпа, 20-кем таӆ араткем щи культура верат ӆэщатты тахайн утща щирн уӆӆам па рупитӆам.
– Нын Касом-Нёӆ куртаӊ щутщаты хотн, аӆпа, ищи якты-арыты хот, ёшаӊ рупатайт ӆэщатты тахайт пуншман тайӆаты?
– Ханты мир арат арыты па арсыр як хорасат ванӆтаты таха катрашак тайсув.
Юхат па муӊ нэӊӆув иса кашӆы щитат пеӆа уӆты питсат па щи верӆув айӆта ёрэматыя питсув. Щиӊанща имоӆты ёшаӊ рупата верата муӊ тата катӆастыя питсув. Ин тамхатӆ унты щи онтасн арсыр па тахаятн ӆэщаттыя емаӊ хатӆата яӊхтыя муӊ щи вуянтсув. Тамхатӆ ищипа муӊ щутщаты хотэвн, рущ щирн ки ястатыя, аратэӆн няӆ клубной формирования тайӆув, хота па муӊ куртаӊ нэӊӆув уӆӆат, арсыр верат туса па хорамаӊа верӆат. Щиты ин «Хатӆ сэв» нэмпи кружок ӆэщатсув, хота Екатерина Петровна Конева (Тырлина) арсыр як щирата айшак эвет утаӆтаӆ. Ӆув, ванта, фольклорной мастер нэм тайты ими, па кашӊ ханты мир якат муйт иса туса уйтӆаӆы.
Щаӆта «Тус нэ» нэмпи кружок па пуншсув. Щи тахайн, ванта, ма сыр-сыр ёш рупата верат муӊ куртаӊ нэӊӆув пиӆн ияха кашӊ пуш япсыена ӆэщатӆув.
Юхат мет туса верам муй ёнтам пормасыет па ӆуматты сохат акатӆув, щитат арпелак эӆты вантӆув па артаӆаӆув. Щаӆта веӆщи арсыр емаӊ хатӆат порайн патан туӆув па еӆ тыныӆув. «Ма Ӆорвош мувем» емаӊ хатӆ верам таха хоща муӊ верантты нэӊӆув мир еӆпийн ванӆтасат, муй щирн нёващ сохмат вуӆы ӆон эӆты япсыена вертыя рахӆ. Щи отат муӊ кутэвн шеӊк сора, туса Галина Григорьевна Лобанова ӆэщаттыя хошӆ. Щи вер тумпийн, тата мосванан нох хорам тонтэт эӆты муӊ хинтат ёнтсув па анат-сунат муй воньщапат версув.
Мосӆ ястатыя, хоты муӊ нэӊӆув там йисн сыр-сыр хорат нови тонты хоща ханштыя па туса утаӆтсат. Щит, ма щирэмн, ищиты шеӊк мосты рупата вер.
Щаӆта муӊ куртаӊ щутщаты хотэва яӊхтыя муй веранттыя нэӊат хоӆыена яма паннэ па сорт хуӆӊан сохат нох хорты, ӆэпта вертыя па щитат эӆты ар ай пормасыет муйт иса ёнттыя верытӆат. Ванта, кашӊ хатнэху яма там хащам таӆатн уйтӆаӆы, хоты катра порайн хантэт хуӆ сох эӆты ӆэтот тайты сыр-сыр хират муй арсыр ӆуматты сохат хошты кемн япсыена ёнтсат па уӆты щиратн еӆӆы тайсат.
– Изольда Петровна, тамащ емаӊ хатӆат нынана муйсыр онтас верӆат?
– Ма нумастэмн, шеӊк ям па муӊева мосты уйтантопсайт ӆэщатты там йисн питсайт. Щи онтасн, ванта, муӊ верты, ёнтты пормасӆув муй ӆуматты сохӆув тата еӆ тыныты щир тайӆув, рут ёхӆув пиӆн уйтантыӆув, ар вер оша верӆув!
Владимир Енов ханшам потар
Авторы
Лух Авт
Темы