Лух Авт
Ханты мир пеӆа самаӊ рущ нэ
Поӆнават курта яӊхмеман щутщаты хатаӆан кулупн усам. Щита «Сорнеӊ ёш» тахия куртаӊ имет актащӆат, Светлана Николаевна Сайнахова туӆ. Щи порайн ма ар ими пиӆан потартсам, щи кутн Лариса Николаевна Шилова пиӆан, ин ӆув эӆтайӆ ханшӆам.
Там рущ ими — Поӆнават куртаӊ ими, тата Ас нопатты тыӆащ 26-мет хатаӆан 1959-мет таӆн сэма питас па энмас. Ащеӆ почта хотан монтёра ус, антеӆ хатӆ сыс ай няврэмат тайты хотан па интернатан эвет-похат вантман рупитас.
Лариса Поӆнават куртаӊ ашкуӆайн нийӆ класс етшаптамаӆ юпийн 1975-мет таӆн Ёмвошаӊ медучилищайн акушерской тахайн утаӆтыты питас. Щаӆта 1978-мет таӆн айӆат нэпекаӊ нэ Кондинской курта рупитты китса. Тата 30 таӆ санэпидемстанцияйн химик-лаборанта рупитас. Рупатайӆ самаӊа тайсаӆы, ванты, хатнэху мушат эӆты оша понас, щи юпийн оша йис, муй щирн лекщитты мосаӆ. Л.Н. Шилова ар таӆ яма рупитмаӆ ураӊан ар ишакты нэпек тайӆ.
Антеӆ-ащеӆ мушитты питсаӊан, щишн 2007-мет таӆн Лариса Николаевна пенсияя манмаӆан ёхӆы рут Поӆнават куртаӆа керӆас. Тата антеӆ-ащеӆ вантман тайты питсаӆы. Щаӆта ӆын антома йисӊан. Ӆув тата уӆты хащас. Икеӆ ищи Кондинской курт эӆты щий уӆты ёхтас.
2008-мет таӆ вуш эӆты Лариса Николаевна «Сорнеӊ ёш» тахая яӊхты оӆӊитас, потартаӆ: «Щикуш ханты мир кутан усам, энампсам, туп нэмоӆт порайн щи мир ими вер эӆты оша ант версам. Нумӆэм, антем иса порайн щашкана сохамн хорамаӊ хорат ёнтас. Ма ӆув пеӆайӆ вантмеман ищи вуратсам ищиты щи хорамаӊа ёнтты.
Рут куртэман щутщаман уӆмеман «Сорнеӊ ёш» тахая ёхатсам. Ханты имет манэм самаӊа ӆыв мирэӆ ханшет ванщты, ёнтты, тыйты, сакаӊ кеӆат, намтат, сакаӊ юхат па па арсыр отат верты утаӆтасат. Ун пумащипа ӆувиӆаӆа ястаӆам. Щи тумпийн ма антем иты щашканан сохматан хорат ёнтӆам. Ма хорат ёнтты ураӊан нэман мосты отат ӆутсам. Иса верам пормасӆам арсыр вантопсаятан альсам. Ёнтам, тыйм пормасӆам рутӆама па пиӆнэӊӆама мойӆаӆам».
«Сорнеӊ ёш» тахая яӊхты ханты имет Лариса Николаевна эӆты ищи ар ям ясӊат ястасат. Оша йис, ӆув туса ханты ханшет ванщты, ёнтты, сэвам вайт тыйты утаӆтыйӆ.
Еӆӆы ӆув щемьяеӆ эӆты айкеӆ тус. Оша йис, икеӆ пиӆан кат няврэм, эви па пох энмаӆтсаӊан. Похаӆ ӆын пиӆанна уӆ, эвеӆ икеӊа йис па Смоленской область хоща уӆ па рупитаӆ. Лариса Николаевна кат хиӆы па хиӆнэӊие тайӆ. Эвеӆ ищи ӆув итэӆа ими вер пеӆа самаӊ нэӊие — иса порайн ёнтаӆ, тыйӆ, хорамаӊ аня лыптат вераӆ.
Ӆуӊ порайн Лариса Николаевна унта яӊхты вераӆ мосмаӊа тайӆ, щита торнат, рыхат, толхат па нохрат акатаӆ. Хот пуӊаӆан арсыр аня лыптат па овощат энмаӆтаӆ, щитат эӆты арсыр эпӆаӊ ӆэтотат кавартаӆ.
Щимащ сорни ёшпи ими пиӆан Поӆнават куртан уйтантысам.
Людмила Шульгина ханшам потар
Авторы
Лух Авт
Темы