Лух Авт
Ассоциация «Ямал – потомкам!» 35-мет таӆаӆ постас
Там ӆапатан Пулӊават вошан Ассоциация «Ямал — потомкам!» 35-мет таӆа йис. Щи воӆаӊ веран аратаӆ мир яха уйтантыйс. Сот моӆтас делегат округ вошат па куртат эӆты ёхтас.
Уйтантыйм хоятат потар тусат, хоты сахат там хатӆатан Овс мув шимӆаӊ мир хоятат Ямал муван уӆӆат, муй хорпи нётопсайт ун хоятат па ай няврэмат ураӊан верӆайт. Тащан яӊхты, хуӆ веӆпасӆаты, рут ясаӊ шавиты вератан там йисан закон мохты аршак нётопса верты питса.
«2024-мет таӆ муӊ урӊеван шеӊк мосмаӊ, Ассоциация «Ямал — потомкам!» 35-мет таӆаӆ постаӆ. Там организация тыйм вуш эӆты шоши мир хоятат уӆапса сайӆаман тайӆэв. Ар хоят юр па щём понас там мосты верэв туты ураӊан.
Кашӊ районан муӊ филиалат тайӆув, щи веран куртатан па вошатан уӆты хоятат щита рупитты хоятат хоща верытӆат яӊхты па ясаӊ верты. Муй нётопса, ясаӊ ӆувиӆаӆа мосаӆ.
Муӊ хощаев учёной мир, няврэмат утаӆтыты хоятат па па тахаятан рупитты мохиӆув там организацияя ӆоӊман уӆӆат. Хой шоши хоятӆаӆ эӆты нумасаӆ, па ӆаӊхаӆ, ӆуӆан, еӆӆы хатӆатан ищиты йис мирӆув уӆапса еӆӆы ат манас.
Хольмаӊ пеӆа вет таӆа йис, хоты Ассоциация энамты няврэмат отделение рупитаӆ. Щи веран ӆув ищи ияха уӆӆат, куртатан па вошатан уӆты няврэмат пиӆан рупитӆат, нэмоӆты хоят ант ёрэмаӆат», — Ассоциация «Ямал — потомкам!» куща Эдуард Яунгад ястас.
Хащам таӆатан Овс мув шимӆаӊ мир хоятат ураӊан Народная программа ханшман уса. Хон мувев ӆоватан, атом хонщапсая питыӆыйм порайн, волонтёрат аӆ мира шеӊк нётсат. Тащан яӊхты па хуӆ веӆпасӆаман уӆты хоятата ӆэтот, мосты пормасат Кев сыӆ, Ямальской, Пуровской па Тазовской районата тутӆысат. СВО питщам вуш эӆты, ӆыӆ сайӆаты ураӊан, ханематы хоӆпат сэвсат, мосты пормасат актыӆыӆат па ляль харата тутӆыӆат, китӆат.
Шеӊк воӆан рупата верман уса, хун «дорожной карта» верса. Шимӆаӊ мир хоятата мосты нётопсайт хоӆ щий ӆоӊаӆман усат. Ин чумовой капитал кимет няврэм сэма питтыйн маты питӆа. Тазовской районан мув-йиӊк сайӆаты харат нампар эӆты сыстаптаӆайт.
Щи тумпийн, аӊкиӆы-ащиӆы хащам няврэмат нётопсайт па аршака верты вутщиӆайт, яӆап вератан ӆоӊаӆӆайт. Касӆыман яӊхты няврэмат хот пормасан маӆайт: улатан, нюкетан, куран, нови тут маты хошапан.
Там сус эӆты вуӆы нёхи маты тын эӆатса, 450 соӆкува эӆты 500 соӆкува унты. Куш айшукие, ищипа нётопса. Вуӆы портун ӆаращ яӆап пормасатан тэкаптаӆа. Касӆыман яӊхты хоятат ищи мосты аратан портунан кашӊ пуш маты питӆайт.
Там воӆаӊ хатаӆан кашӊ хоята мойӆапса ясаӊ китӆув, муӊ тамащ Ассоциация «Ямал — потомкам!» тайӆув. Ханты па ур ёх ияха пиӆтащман аӆ хоятата мосты организация версат. Леонтий Антонович Тарагупта нэман мийм организация хув ат уӆ, аратаӆ мира ат нётаӆ.
Аллина Тоярова ханшам потар
Авторы
Лух Авт
Темы