Няръяна Ӈэрм
Вар мадавы, си’’ив падрота’’
Выӈгана илена’’ ӈэрм’ тер’’ ембдяродо’ сяхаринда сава’’ ӈэсеты’’. Ӈацекы’’, хасава’’, не’’ ембдяро манэ’’лабтамбиць.
Время для чтения ~ 2 минуты
Тюку по’ сэдвыдо’ тэвравы’’ ӈокаць. Поӈганандо’ яланда ӈоб’’лери хасава — Ӈокдэтта мэсь. Пыда Панаевск’ вымна мюсерӈа. Ӈацекы’’ небянато’-хаданато’ сэдавы панэцидо’, мальцидо’, пивидо’ ӈадимдембиць. Серо’’ теневана’’ ӈули’’ тяхасовна манэ’’саръядонзь.
Ензя’ няд товы Любовь Ямкина тарем’ мась:
— Мань хар’’н мадавы’’ ӈодякоход сэдвы панэми, савами, пивини’’ манэ’’лабтамбидамзь. Тикы’ е’’эмня си’’ми ни’’ ненадумда’’. Тэри Сянакова ялян’ тетюмдей’’ товами. Манэ’’манда, тэмдаванда ӈока. Мань хобадами, пени тэмдаван’ харвадм’. Илебей не ӈэвани маляӈгана етри’ сэдорасетыдм’. Та’ маляӈгана ламп, линюй ялякоцям’ мэ’’цетыва’’, етя мадавында харми танясь. Тюку илаӈгана мядото’ мюй’’ яля’’.
Ненэцие’’ помна ядэрмани сер’ «Парад оленьих упряжек» нюбета пирдырман’ тэвываць. Таняна хасава’’, не’’ масеретна’’, подермы’’ ханодо’ манэ’’лабтаць. Таӈгарка янамбовна нито’ пумна ханодо’ вадаръядонзь. Ӈоб’’ ханм’ вадармым’ Анастасия Лаптандерм’ хонрамбидамзь. Пыда вадида тарцяць:
— Маня’’ Пэ’’ нямна мюсерӈава’’. Небо’ тюку конкурсахана мэдамзь. Нябимдей ян’ ха’’мыдамзь, ӈани’ тось таславась.
Лаханако ня’’мы нями паромбарка ханамда валкая, сита хамы няхата хаясь. Тыто’ подеро’’ ӈадимдембавы’’ ӈудито терӈэ есь’’ ӈэся’’ — сертификат ми’’ӈаць.
Саляӈгардаханана’’ Сянакова ялява’’ сававна хая. Мале ӈока пон’ нивы манэ’’мы нини’’ ядабтадамзь. Конкурс’’ хавна тамна мэкад, илека ӈавэ’’ манэ’’ӈаваць.
Автор: Руфина Окотэтто’ падвы
Авторы
Няръяна Нгэрм
Темы