Няръяна Ӈэрм
Тецьдахад мэбе’’ӈа’’
Ты пэртя’’, харад’’ тер’’ сяхаринда нарам’ саць ӈатесетыдо’. По’ ямбан’ Сянакова’ ялян’ хамекосеты’’. Хасава’’ ӈэсоӈодо’ высылпаӈгу’’, не’’ едэй паныдамдо’ сэдыбаӈгу’’, ӈацекы’’ нисянадо’, небянадо’ нядабаӈгу’’. Сямян манзаямдо’ мэ’’марихидандо’ хардан’ ӈэдалаӈгуд’’. Тюку по’ Яр Саляхана 63 мэва’ ма’’люрӈа’’. Саць ӈока’’ пирдырта’’ ныхыдо’ манэ’’лабтаванзь товы’’. Ӈадьбята пирдырмидо’ няхар’’ яля’ ямбан’ мимы’’.
Время для чтения ~ 4 минуты
Сянакова’ ялям’ Ямальской район’ ӈэвахана мэна Андрей Кугаевский нэмбидась. Пыда тарця вади мэ’’ӈась: «Мат’’ ю’’ няхар’’ по’’ ямбан’ ӈарка хэбидя ялява’’ мэ’’ӈава’’. Мале ӈахакуй’’ похот нёдана серма’’ ӈоб’’ нерняри’ минрева’’. Яляна’’ падаркана сямянхат ненадо яляӈэ тасламбива’’. Ты пэрти’’ е’’эмня савари вади мэ’’ӈадм’. Минрена серто’ ненэся тоена, тикахад саць ӈарка таром’ яхана’’ ха’’аврамби. Пыдо’ мэбета’’, ӈамгэхэртм’ ниня пилюта’’, сейдо’ мэё’’ ненэця’’. Иландо’ нензел’’ нибта ӈод’’ ӈа’’, невхы иринато’ табеку нёда’’. Хусувэй по’ тыдо’ вадаби’’, ты’ илам’ нерня’ минре’’. Пилибт’’ ӈобанзер’’ ӈада’’, ӈопой им’ мэць иледа’’, ӈацекыда’’ тохоламбида’’. Мядонзэй хамэдамбадаха’’ ӈобтикы ӈарка вадам’ мэ’’ӈадм’. Сензда’’ ӈада’’, илра’’ сава ӈэя».
Мядонда’’ яна’’ ханярид товыць. Е’’эмняндо’ хуркари сава серо ӈадимдембиць. «Ӈудини тарама», «Харбё хасава», «Колыбель Ямала», «Сава хан», «Мядо’ ил’» пирдырма’’ миӈаць. Тикы’’ хавна концерт, выставка сертабиць. Ямальской район’ серо минрени’’ харад’ хэвхана ярмарка танясь. Ненэця’’ хуркари тэнз ӈаво мирдапиць. Хано мирдапада’’ хасава’’ таняць. Тамна’ тяхакуна паны’ мадавы, пиби мирдапада’’ не’’ нуць. Хэвханандо’ халэ есьпада мэсь. Ядэрта’’ сидя хэвхандо’ нулаӈгаць. Тэмдортадо’ ӈока ӈэва’ сер’ ӈась. Нюдяко лавкаця’’ ядувна мимб’’, сямян таранам’ хось пирыць.
Хасев’’ пирдырма
Пирдырта’’ ӈани’ ӈоб’’ хэвхана мэць. Яркуланаха’’, хано санарпадаха’’, няхар’’ мэва ӈопой яхад санартаха’’, ныхыдыртаха’’, таротаха’’ ӈоб’’ ёльцяӈгана сырӈаваць. Харад’ тяхана, салмуй я’ няна этнобитлон ӈась. Таддикахад ӈацекы’’ пям’ ня’’амба сюрберӈаць. Ламбитана’’ ӈобтикы таняна мэць. Нумда хадӈэ, мерцяӈэ еремясь, ханяӈэрихина хаер’’ ӈадиберӈась.
Мале ӈока пирдырма ӈоб’’ ирсу’’ ӈаць. Ӈадьбята хусувэйм’ манэ’’ма’ пир нись ӈа’’. Едэйвана ӈадимы этнобиатлонм’ няби ламбита сюрбермам’ манэ’’манзь хан’’ӈадамзь. Тикэхэ’ ӈобтолсаркаха’. Нюртейхана ламбита няби яркула тара. Ӈопой’’, нябихина ямб няда яӈгацярхам’ ня’’амба тара. Няра мальцята’’, сибёцяко пибита’’, нянзико пя ламбита’’. Хэвхандо’ ӈока сыртам’ ма’’лаць. Ӈопой серм’ минренаха’’ сырап’’, сяхаринда илека. Хусувэдо’ няхаданда пере, хибяхавадо’ янопата мал’’ пуня’ ха’’морӈа’’. Этнобиатлонм’ нюртейӈэ Панаевск-1 команда пирдаледась. Пуданда ТСО «Я’ ерв» тер’’ тоць. Новой Портхад ӈэда ТСО «Ханибэй»‘ тер’’ няхаромдэй’’. Ламбитахава ӈобтикы Панаевск-1 команда мере’’ӈась. МОП «Ярсалинское» нябимдей ян’ ха’’мыд’’. ТСО «Я’ ерв» няхаромдэян’ еремя’’.
Ӈани’’ тэнз’’ пирдырмаха’’на мэбете’’э’’ ӈани’ ӈока’’. Вячеслав Худи няхар’’ мэва ӈопой яхад ӈаха санавы’’ . Виктор Вануйто яркулабта ва’’лёй ӈэвы. Сергей Лаптандер ӈока ханм’ санавы. Лев Езынги Новый Порт’ ед’ сянаковы. Пыда ныхыдырмахана пир’’мэда. Сёяха’ тер Яков Яптик таро’’махана ва’’мы. Максим Салиндер ӈэдалёбта тоенавы, лабкамда сидя минута 36 секунда сюртембавэда. Тамна сидя ӈэдалёдам’ ненадумдаць: Павел Худим’, Хасавако Яптикм’. Тюку по’ сямянхат ва’’лёй’’ ти’’: МОП «Ярсалинское», ТСО КМНС «Харп», ТСО «Ханибэй». Пирдырта’’ снегоход няби еси ня’’амвы’’. Е’’эмняндо’ ӈадя сава ӈуда’ тер хамэдавы’’.
Автор: А.Яптик’ падвы
Авторы
Няръяна Нгэрм
Темы