Няръяна Ӈэрм
Нида нерня’ минре
Ӈацекы’’ шкохана мэвандо’ хавна, урокато’ пуд хуркари пэръяха’’ ханцеты’’. Падтаӈговам’, сянэхэ’’на сянаковам’, пирдырмам’, сём’ мэ’’мам’, таравам’ сяхариндо’ харвабтадо’. Таӈы’’ нуво’’ то’’махад мал’ ныланасеты’’.
Время для чтения ~ 4 минуты
Милена Казымкина тара тохоламбада’’ ӈацекыда ныланаванзь ӈэдарэйда. Пыда Тарка’ саляхана «Лаборатория.DANCE» студияхананда манзара. Арт-резиденция «Пур» нюбетахана ӈацекы тохоламби. Нянда нюртей классаха’’на мэна’’, юкад вата потна’’ турӈа’’. Ӈармы, илебей ненэцие ӈани’ тохоламбида. Вадавнанда турман’ харванахав ӈока. Мале торомбэйха’’на нензел’’. Ненадовна ӈацекэхэ’’на нюрцям’. Пыдо’ яля’ ер’ пуд маймба таралава’ мэлван’ мятюӈга’’.
Лаханакурць ня’’мы нями манзаида етри’ падыбида. Ханяӈэхэ’’на тованда едэй ирыхына мэвандида ӈахакуд тасламбида. Тет по’ тяхана Пяку’’ яхананда ненэцие’’ ила’ саирм’ лэтрамбава мякана «балетмейстер»ӈэ манзаравысь. Сцена’ ниня ӈадимдембуванда’’ тарабцо манэ’’лабтамбавысь. Сёётани, яӈга тарани табедамбавысь. Пыда саць сававна манзаямда теневада. Ӈадьбянда харта ивнянда таралавам’ нэвы.
Пэръямда ӈоб’ минреда
— Мань Тарка’ саля’ маркана соядамзь. Ӈацекы ӈэвани мальӈгэхэд таравам’ харвабтавась. Школахана тохолко пэ’’махадани, тодо’’ тэнз’’ ненэцие’’ ила’ саирм’ лэтрамбава мякана «Калейдоскоп» нюбета ансамбльхана мэсетыдм’. Хасаваюдимдей классам’ мале’’мяхадани Саляӈгард’ тохолкулвахана хореографической отделениян’ падрони ӈэдарэйнась. Сидна’’ Ткачева Наталья Геннадьевна таранаӈэ тохолкова’ танявам’ няни ваде’’ӈась. Манзаям’ тохоламбавани мальӈгана пэръяси’’ нидм’ мэсету’’. Хуркари’’ конкурсаха’’на вареми мэцетыдм’. «Диверданс» нюбета ансамбль’ тердамзь. Колледжм’ сававна малевась, няръяна дипломам’ ня’’мадамзь. Пуна мякани тодамзь. Ӈобаӈгуна «Ямальская студенческая весна» фестивалян’ еремядамзь. Теда’ тикы серм’ Пуровской районхана мань минрев. Тамна’ тяха’ Тюменской государственной культура’ институтхана тохолко таславась. Тюку та’ таня’ сессиями мэ’’манзь хандадм’.
– Тюку по’ Россияхана ӈэда ӈарка Арт-кластер’ — «Таврида.АРТ»’ амбассадорӈэ тарадамзь. Та’ мальӈгана тодо’’ тэнз’’ ненэцие’’ ед’ сертавы «Молодёжь и дети 2025» проектм’ ваде’’ӈаць. Мань тикахана «Российский Север» нюбета форумам’ ӈадимдембидамзь. «Хореографическая мастерская «К солнцу» нюбета проектм’ сертабидм’. Ӈэрм’ тер’’ ила’ саирм’ манэ’’лабтамбаӈгудм’. Си’’ми «Росмолодёжь» тидхалемби. Етри’ едэй ӈамгэхэ’’ тохолкудм’.
Илебей ненэцие тидхалемби
— Ноябрьскахана 2023 похона «Заполярье.ЛАБ» нюбета сер’’ миӈась. Тикахана театрм’ ханзер’’ сертаба таравам’ ӈадимдембиць. Пуровской районхад ӈэдаравы’’ ненэцие’’ ӈэвахана мэнаӈэ тарадамзь. Нини’’ нерня’ тидхалембидамзь. Тикы’ пуд си’’ми хуркари’’ илебей’’ ненэцяӈга’’на тарана серо минренаӈэ тэрабасеты’’. Небой по’ Пяку’’ яни ӈэвахана мэна ерв’ тидхалембада илебей’’ ненэцие’’ Совет’ терӈэ хаядамзь. Хэбидя ялэ’’ ёльцяӈгана марканана’’ нермбэртяӈэ тарава’’. Сяхаринда илебей’’ ненэциена’’ мал’ ила’’ саирм’ нерня’ минренаӈэ тараӈгу’’.
Ӈабцата ӈод’’ Милена ва’’лёй пэдава не. Ӈани’’ нида нянда сыраць хуркари’’ серка’’на мэван’ харваӈгу’’. Пыда Ямална’’, Россияна’’ ӈардавна миндаха’’на етри’ варемда мэцеты. Хусувэй нянанда тараванда едэй ӈавэ тохоламби. Пилю’’ ирыхына проектанда нямна намдаӈгува’’. Та’ ямбан’ сертабаванзь ваде’’ӈадась.
Автор: Руфина Окотэтто’ падвы
Авторы
Няръяна Нгэрм
Темы