обновлено: 03:47, 25 августа 2023
Няръяна Ӈэрм
Невхы сянако мэ’’мы’’
Ты’’ ниць иры’ пудана ныланава яляхана Саляӈгарад’ тер’’ ӈацекы’’ сянакованзь ӈобт’ ма’’лёвы’’. Небянадо’, нисянадо’ ӈани’ тикахана мэвы’’. Тамна илебей ненэцие’’ ма’’люрма’ хардан’ «Полярисан’» мядонда’’, «Школа общественной дипломатии» тохолкода’’ тюӈгавы’’. Сиддо’ Саляӈгардыхы «Ямал — ню’’на’’ я» ассоциация’ тер’’ ма’’лавы’’.
Время для чтения ~ 3 минуты
Харад’ мю’ тювани сер’ ӈарка’’ толь’’ ниня хуркари сянако манэ’’ӈадм’. Ӈопой’ ниня ӈухуку’’ ӈэвы’’, сямян ӈамгэрито’ тэнз’’. Таминда ими нюдя ӈэ’’мяни нямна хая. Сяхаӈгав’ мань ӈани’ тарця сянакоцяни таняць. Вандако’ мюня тедалахана сюрванӈгабя’’. Ӈани’’ толь’’ ни’ сылыв’’. Вывко, пэсько, сюрни, тыранийко, пя хобцо манэ’’ӈадм’. Ялэхэ’’ минрена серони’’ нямна юрхарт’ юрвэдм’, паромбари сянако’’ няна хаядм’…
Тарем’ мэнахана’’ ненэця’’ етри’ ӈокамдана пэяд’’. Мал’’ ӈамдыд’’. Сцена’ ни’ тарана’’, сё мэта ӈацекы’’ ӈадимя’’. «Вы’ сей» группан’ ядэрта’’ ӈэвы’’.
Сидна’’ майлабтавандо’ пуд хусувэй сянакубцм’ няна’’ вадець, манэ’’лабтамба пя’’. Линда Яндо хасава нюнда ня’ товэхэ’. Нядмада сэр’’ мадавэсавэй мальцянда таӈгам’ сервы. Небяюм’ падтаӈгованда сер’ лахана:
— Тюкон’ товами ихинани ёльце сава. Хасава нюми мань мэ’’мы сянакуни манэ’’ӈа. Пыда тандая’ вадёдана. Нюдя ӈэдаханда харта иламда, ненэйвана сянаковам’ хамэдамбабата тара. Хардахана Нядма харта тынзянда, ненэй ӈамгэрида таня’’. Вынд’ тэвбата ты’ нямд яркыбасеты, ханакохона едейкурцеты, ӈынм’ мэцеты. Мань тасламбив: маркана илена’’ ӈацекы’’ ӈобарка’ тарем’ ма’’люрпато’ сава ӈэӈгу. Тикахана иландо’ саирм’, вадамдо’ теневаӈгу’’.
Ӈобкарт тэри мэна ненэць’ яӈгусь. Ханяӈы’’ вывко муно’’лабтамби’’, ӈани’’ сюрня сюре’’ле’’, хобцо пюрӈа’’. Маламбой’ варедо’ мэ’’ӈа’’. Яляндо’ ханзер’’ хэвам’ хамэдахарта нидо’ хамэда’’.
— Тюку яля’ «Поиграем по-ямальски» сянакубм’ сертава’’. Ямалхана илена’’ ӈэрм’ тер’’ ненэцие’’ сянако манэ’’лабтамбива’’. Ӈацекы’’ иринато’, хаданато’ ила’ саирм’ тохоламби’’. Таддикахад луца’’, тамна хибяри’’ илма’’ манэ’’ӈа’’, илна’’ нямна намда’’. Нянандо’ ӈули’’ савась, хонарковаримдо’ мэ’’ӈа’’. Маня’’ ихинана’’ тарця серм’ ӈадимдевава’’ ӈани’ сава. Ӈахакуд хамеко пэйнаць. Ханяӈына’’ сянако мимбиць. Нядаӈгодава’’ ӈокась. Тикы’’ поӈгана Пётр Худи, Алексей Рябов, Марина Кондыгина, Ольга Хоротэтто, Светлана Тусида, Нечей Сэротэтто, тохолкода’’, ӈани’’ нядаӈгован’ харвана’’ мэць. Няндо’ ӈарка вадам’ ӈэдарамбива’’, — тарем’ Саляӈгардыхы «Ямал — ню’’на’’ я» ассоциация’ отделения’ ӈэвахана мэна Дарина Рябова лахана.
Теда’ ӈарка маркана илена’’ ӈацекы’’ невхы сянако мэ’’мадо’ ёльце сава. Тюку ялямдо’ пон’ тенеӈгудо’. Харвабта, та’, по’ хэ’’мяхад ӈани’ ӈобт’ ма’’лёда’’.
Анна Яптик’ падвы
