Няръяна Ӈэрм
Неняӈг’’ иры пэй’’
Мэта яля’’ нямъито’ яӈгу. Ялэна’’ тэри’ пулаӈганараха’’. Сертавы манзаяхарихина ялэна’’ ханзер’’ хан’’мам’ хамедамбива’’. Ихиня теняна тандая’ нердена сырада ха’’амнархась, няби сылавахана едэй пом’ пява’’. Пуна нарэй нувона’’ пэйдаць. Сыранда холкавахавм’ пон’ ӈатеваць. Ӈатенавасялмаваць. Нувода ядево’’махад салабада хэӈгадась.
Время для чтения ~ 4 минуты
Теда’ мале ӈани едэй ирым’ пява’’. Пивня ядэрпана’’ сыра’ ямбан’ мэ’’мы’’ сабуйна’’ екэйна’’. Пон’ пивня сяврырап’’, хаер’’ ӈэвна’’ лядпи. Ненэйвана ӈылекина’’ тиӈгуд’’. Мэ’’манда ирыва’’, ненэй ненэцяӈэ неняӈг’’ ирыӈэ ваде’’ӈава’’. Нямбод паӈодаӈгу’’. Пыдо’ пилютадо’ яӈгу. Хибярим’ таӈылмдаӈгу’’. Ӈадьбята тосасетыва’’. Та’ ёльцяӈгана вы’ терна’’ иландо’ неняӈгаха’’ табаӈгана ни ӈа’’.
Мале маӈгты’’ иры’ пунякуна ты пэртя’’ та’ паде ня’’манда нядамдо’ пюсеты’’. Ханяӈыдо’ ӈобт’ ӈэсосеты’’. Неняӈг’’ ирыхына ты’’ теневанадарев’ ӈобт’ мандалаӈгасеты’’. Неняӈг’’ харто’ ирыхыдандо’ тенева’’. Нерденидо’ ваӈг’ тэлхана мале ирындо’ нерня тилсетыд’’. Тарцям’ манэць мяд’ тер’’ не’’ вандакуто’ мюд по’ тяха’ сюрвы есьредо’ нэкалцеты’’. Ну’ тяха’ ва’’ав’ сер’ иням’ вэӈгала’’махад есьредо’ сярсетыдо’. Тарця вэӈгона ненэця’’ таӈга немадо’ мэ’’ӈа’’. Ва’’ав’ нид инзелеб’’, пихий ея’ тяхана неняӈг’’ хумнадо’ я’’авласеты’’. Яля’ мяд’ мюйм’ пандаб’’нандо’ не’’ якэм’ сертасеты’’. Неняӈг’’ якэм’ сэвна’’ тяхад пилю’’ӈадо’, ӈадьбята выӈгана та’ ӈадьда тум’ пятаби’’. Ненэцяӈгав пыхыдамда ӈылекахад лэтра пирӈада. Пыда тамна’ тяха’ харта пыхыдаримда неняӈгахат ни ӈэдарамбю’’, лэтрамбада’’ тыта нямна ӈани’ ида ядэрӈа. Вы’ тер’’ тамдо’ мадаванзь яв’ ня’ мюсерӈа’’. Таняна неняӈгада тянё. Сэхэ яляхана малкода’’ мэта тыдо’ халя’ юркана масарпидо’. Мякнандо’ тыто’ нува’ мальӈгана мерця’ няд ӈарка’’я пурад сертаби’’. Тарем’ неняӈг’’ ӈамгэ’ мянувна хасерӈга’’. Та’ ёльцяӈгана писавэй яля’ тэхэнандо’ мэ’’. Нибто’ ерамбю’’, ӈэсы’ тер’’ тэси’’ хаёда’’.
Иландо’ тэхэтато’ пере.
Ӈэрм’ я’ няна неро’’, паё’’, пюӈг’’ вэба’’ вады’’. Яля’ няӈы ваӈг’ тэл’ ӈылна нув’ панодарев’ ӈамдэд’’ ӈадиберӈа’’. Ханзо нумгана тэкоця’’ хадырць варемдо’ мэ’’ӈа’’. Пыдо’ нянондо’ падяраха неро’’ мал’’, ӈамдэд’’ ӈули’’ ӈавыдо’’ӈа’’. Неняӈг’’ паӈохона ӈэсы’ тер’’ хусувэхэна ни’’ ямдаӈг’’. Ӈули’’ тыто’ паде я вомб’’, пэвсюмя’ няӈы ханзохона ямдасетыд’’. Пи’ ямбан’ мюсе’’мяхадандо’ ӈод’’, ты пэртя’’ пон’ ни’’ хоню’’ — немасяда ненэця’’. Мяд’ не’’ нердена тыто’ турохо’’на ӈэто’ ни’ санаӈга’’. Ханяӈэхэ’’на пи’ саць падеб’’нандо’ малкода тыда мяканда тэврамбида. Тикахана нядо’ подёдамда нэкалманда е’’эмня мята тер’’ ты’’ тяха’ хан’’ӈа’’. Хубтахана ӈод’’ малкода тоб’’, ӈани’ няд’’ма тараӈгу. Пыдо’ ӈани’ няхандо’ пяӈгудо’.
Неняӈг’’ ирыхына падена’’ ты’’ идарманзь пяб’’нандо’, пуна падева’ ян’ ты’’ мандал’’ ӈадимзеты’’. Тикы’’ небянадо’ пюна’’ таско’’ ӈэвы’’ ӈэсеты’’. Ӈамгэ’ пиркана яхадей’’ тосеты’’. Падевандо’ ямбан’ таско’’ тарем’ небянадо’ пюсь нявотарта’’. Мякана мэна’’ ӈод’’ ни’’ таӈгасету’’. Пыдо’ ханяӈэхэ’’на тохона, яха’ мюня пядвы поӈгадо’ манэсарцеты’’. Та’ ёльцяӈгана ты хадабава’ ёльць’ ни ӈа’’, ӈадьбято’ мюсерта’’ ӈаебаддандо’ халэ хадаби’’. Сиддо’ школахана тохолкода’’ ӈаркамбой’’ нюдо’ нядаби’’. Пыдо’ тедари’ харад’’ нямна идо’ ни’’ ядэр’’. Тамна иры’ пеля пивня сюрберта’’. Ӈарка нито’ няд’’маӈэ тараӈгу’’.
Неняӈг’’ ирыхына нядэна’’ ненэця’’ ӈани’ ни’’ хасена’’. Халям’ пэртя’’ ёрӈа’’. Харта ӈод’’ неняӈг’’ ид’ варм’ саць харвабтадо’. Поӈгадо’ сибдамбади’’ ӈэва’ ний’’ неняӈгахат паридесеты’’. Хардахана илена’’ теда’ ныланава’ паӈодо’. Пыдо’ ӈаядо’ парадаванзь ядембада ё’’мана ӈэдалёрӈа’’. Таняна ядембадахана нядна’’ манэць неняӈгахат ехэра’’. Таӈга’’.
Ненэй ненэцяӈэ, ханярина илебата’’ ӈод’’, сенаси’’ иледа’’.
Автор: Марина Яр’ падвы
Авторы
Няръяна Нгэрм
Темы