Няръяна Ӈэрм
Ненадо ненэциена’’
Хэвы си’’ив яляхана «Ямал-нюна’’ я!» Ассоциация саць ненадо серм’ ӈадимдесь. Таняна манзарана ненэця’’ нюдяко харда’’мна ӈэдалёрӈаць. Тикы’ нямна Ассоциацияна’’ ӈэвахана мэна Эдуард Яунгад тарем’ мась:
Время для чтения ~ 2 минуты
— Ӈэрм’ терӈэ таром’ ха’’авравы нина’’ нивана’’ юрыбавана’’ е’’эмня тарця серм’ минрева’’. ООО «Ачим Девелопмент» няд’’мяць тидхалембива’’. Няхар’’ ӈарка няна’’ Семён Николаевич Няруй’, Леонид Васильевич Лапцуй’, Николай Лачевич Окотэтто’ сидяӈго сертаваць. Тикына’’ мел’ ненэцянд’ Эдуард Тользинан’ ваторъянаць. Теда’ ӈэдалёро’’маханана’’ сидя нюдяко ӈэсын’ нултаӈгаваць. Нюрте’’э’ Сюнай Салян’ тэворӈаваць. Округна’’ тиӈгывна школаха’’ ненадо ненэциена’’ нюбе мипива’’. Сюнай Саляхана школам’ Семен Николаевич’ нюмгана нюмдеваць. Пыда харта соя’’ма яда, ӈавнанда таняна тохолкусь. Ненэй ненэцяӈэ поӈганана’’ нерденаӈэ музыкам’ ваде’’лась. Тарця ненэцям’ таняна тохолкода’’ ӈацекы’’ теневабто’ тара. Новой Портхана школадо’ Леонид Васильевич Лапцуй’ нюмам’ мэта. Нара’ няна ты пэрти’’ сянакова’ яляхана Сёяха’ няю’ пяӈгува’’. Таняна школадо’ Николай Лачевич’ нюмам’ нюбета.
Сюнай Саляханана тамальӈгана хардандо’ тер’’ хавна Няруй’’ мяд’ тер’’ ӈани’ невхы иринато’ соя’’ма’ ян’ турмыць. Семен Николаевичм’ сававна теневавы’’ ненэця’’ юнета нямдо’ тензебтембиць. Нядма Трофимович Вануйта Анна Ильинична пухуцянда ня’ тарем’ маӈаханзь: «Семен Николаевич таӈоцяӈгана’’ турцеты. Турпата баянм’ мэць хыноцеты. Тудако ма’’ламба сидна’’ тохоламбасеты, тикахат хуркари’’ ӈавыдота’’ ӈавар сертасеты». Евгений Иванович Хороля, Сюнай Саля харад’ ӈэвахана мэна тамальӈгана концерт сертаба нядаӈгурмы. Зинаида Айбаевна Худи КПУхана тохолкованда мальӈгана Семен Николаевич Сюнай Саляхад ӈэвамда намда’’махаданда баянхана сянакурманзь хамэда.
Ӈока по’’ хэбато’ ӈод’’ Сюнай Саля’ тер’’ юнета нямдо’ сававна тензебтембидо’. Ӈадьбято’ теда’ школадо’ юнета няндо’ нюмам’ мэта. Хусувэй хубтахана школан’ тюӈгана ӈацекы’’ ириндо’ нюмам’ толабаӈгу’’.
Автор: М. Яр’ падвы
Авторы
Няръяна Нгэрм
Темы