Няръяна Ӈэрм
Мор ма’’ламбада’’ нямна
Тюку илаӈгана телефонм’ няд’’мяць ханяри лахана пир’’ӈава’’. Хахаяда яля’ вынд’ лаханадамзь. Танянандо’ пяванда ӈарка лахарёми минхандо’ пуня’ мэдо’, мамонондо’: «Тедари’ тэтнава’’, мор маторпива’’». Ненэсяри ты пэртя’’ теда’ ханярина саць тэтна’’. Тыто’ паддева’ хавна моран’ харвана’’ хибяри’’ нито’ пуд нултаӈга’’. Нуммна, я’ нимня няндо’ тэворӈа’’. Иры’ ямбан’ тэхэ’’на мэна нидо’ нёракутыдо’.
Время для чтения ~ 3 минуты
Пэвсюмя’ някуна мюсерта няхани ӈани’ лахана хор’’ӈав. Пыдо’ мале манзаямдо’ малевэдо’. Ӈэсындо’ ерв Хэвдё Яндо тандая’ сававна лахарёмда пяда:
— Саць тэтнава’’. Тына’’ паде’’, ты’’ лекар’’ ӈэсыхынана’’ мэ’’ — яӈгана’’. Моран’ харвана’’ сидна’’ тодо’’ яхат пэрӈа’’. Тюку яля’ Ензя’ тер’’ малкода’’ нултаӈгаць. Хуняна Тасу’ я’ тер ӈатева’’. Маня’’ яхадана’’ ӈэда’’ мордо’ мирцярка’’, ӈадьбяна’’ миретаркан’ ӈокам’ мипива’’. Сава тарана ӈаво тэврамби’’. Ханяӈыдо’ тамна нядна’’ ӈатевта’’.
Ӈавна ӈацекы ӈэвани мальӈгана мальвы тына’’ мора парада’’махадана’’ ӈаворцетына’’. Ёльце ӈавыдоцеты’’. Лы’’ нямдхатато’ пясик мимбасетыва’’. Ӈока’’ ӈэбто’ хэбидя ядрев’ нито’ ни’ нултасетына’’. Ӈанидо’ ты’’ хадо’’ ниня ӈыхы ян’ ябересеты’’. Тамальӈгана хибяхарт ни манзету’’ сяхари’ тына’’ нямд’’ е’’эмня енана’’ таняӈгу’’. Хусувэдо’ ӈокавна есядамда недво’’ман’ харва. Теда’ ненэциена’’ ӈод’’ харвобцудо’ яӈгама’’. Ӈахат ӈаврари’’ тарасеты’’. Теда’ телефон’ зарядник’’, батарейка’’, тамна ӈани’’ луца мутры хаӈа’’. Тарця ӈавэ тэврамбасетыва’’. Ханяӈы’’ ненэця’’ тыто’ мор сяне’’ малкодаха’’ мипидо’. Тарем’ ӈопойнда тарана ӈамгэнда яӈгоб’’, нябинд танявы ӈэӈгу. Миридо’ яӈга’’. — Хэвдё ма’’нив.
Ӈоб’’ мор ма’’ламбада ненэцям’ лаханако ня’’ӈадамзь. Пыда предприятиянда ед’ малкурӈа. Тикы нями ма’’нисяв, нюмми нёр падыбю’’:
— Сидя ёнаркад вата есявна мор тэмдабидо’. Тасу’ яв’ тер’’ хавна ты пэртяха’’на’’ Ензя’ тер’’ тэворӈа’’. Мор ма’’ламбада’’ ӈахат тиртя ӈанохона тирцеты’’. Теда’ сибя самолет мэта’’ ӈокма’’. Маня’’ ӈод’’ ӈобтикы тарцям’ мэ’’ӈава’’. Ӈокам’ ни терас’’, саӈгомда яӈгу, ит’ ӈамдорӈа. Ӈадьбята иде’’ хэван’ мядодо’ мярыбидо’. Сяха’ товава’’ мале ӈахакуд тасламбива’’. Теда’ ты пэртина’’ мал’ матна’’. Хибяхартадо’ пуня’ ни ӈа’’. Тикадо’ нянандо’ ӈарка няд’’ма. Ӈока хибя’’ мерета «Ямаха»‘ матор тэмдаби’’. Ханяӈэхэ’’на ӈани’ пондо’ ёльцянд’ ӈатевта’’. Малкурта’’ тенева’’, та’ ёльцяӈгана ты пэртя тарем’ ӈод’’ татыда, вадамда нида мадаӈгу’’.
Тад тасла, тюку илаӈгана ты’ хусувэй ӈамгэда тара. Яханана’’ сямянхат миретада — морада. Ӈадьбята маня’’ тэхэ’’на мэни нёракуйна’’.
Автор: М.Яр’ падвы
Авторы
Няръяна Нгэрм
Темы