Няръяна Ӈэрм
Янда тер сэдора тохоламби
Индига’ ӈэсыхына мел’’ не’’ мале танякуна харто’ хардакодо’ ӈадимясь. Манзарась мэта хардан’ турта’’ хибяри’’ тянё нисеты’’ ӈа’’. Таняна ӈацекы’’ ма’’люрцеты’’, школахана тоходана’’ турцеты’’. Сэдоралва’ хардахана хаданато’ минревы серм’ теневава’’ е’’эмня ӈацекыдо’ тохоламби’’.
Время для чтения ~ 4 минуты
Ваеравы си’’ивхана мань Индигахана сэдорани’’ хардан’ тюӈгадамзь. Таняна ненэцие’’ ил’ ватом’ тасламбада няхаюна’’, сидя мел’ нехэ’ Александра Выучейской няби Людмила Талеева манзараӈаха’. Ӈэсыхынандо’ сэдорани’’ харад’ танява’ нямна Александра Андреевна мале ӈахакуд ибедорцеты. Ӈоб’’ пиркана Индиган’ Ямалкана илена мел’’мана сэдорана не Любовь Пуйко товысь. Пыда сян яля’ ямбан’ сэдорана нида тохоламбись. Ӈобкана туцям’ сэдыбиць, ӈодяко паӈгалпиць. Тикы’ пуд ӈэсы’ тер’’ не’’ тарем’ тасладонзь: «Ненэцие сэдоравам’ нерня’ минресь сава».
Александра Выучейской’ е’’эмня хари’’ тэнз ембдяро сэдыбава — иланда, ирината минревы сер’’.
— Маня’’ тамна хаданана’’, небянана’’ минревы’’ ӈавэ тенейна’’. Тены’ ёльцяӈгана тарця илна’’ саир’’ пуняю’ миӈа. Нерня’ тарем’ ӈэб’’нанда, юраӈгуна’’. Ембдяро сэдыбавам’ вадёдана’’ ӈацекэхэ’’ теда’ ваде’’пана’’ тара. Мань ихини’ небяв ха’’морӈа. Пыда сэдораванда мальӈгана пили’’ хэвхананда мэсетыдм’, ӈока ӈамгэм’ няданда минредм’. Сэдорава невхы похот миӈа. Нина’’ Тиман’ хоювна ӈыхы’’ похот мюсермы’’, теда’ ӈод’’ тына’’ таня’’. Нисями Андрей Фёдорович илеванда ямбан’ тэхэ’’на мэсь. Небяв Марфа Евдокимовна хэвхананда мэсь, мята пэрцеты.
Тарем’ теневадм’, хусувэй ненэй ненэцие’’ ила’ саир’’ — мань серми. Сэдоравам’ мэнев’, ӈули’’ ивнани ӈа. Тараванда мальӈгана нини’’ е’’эмня пиби’’ сэдыбасетыдм’, ӈани’’ хибярихи’’на тараб’’нанда сэдаӈгудм’. Хардаханан’ манзарасетыдм’. Сэдорава’ е’’эмня яӈга харад’ нямна ими ядэрцеты.
Маня’’ проектм’ падаваць, нюртей тарцям’ сертабиваць, тоенась, нядаӈгодина’’ таняць. Грант’ еся ня’’маваць, тикавна хардаком’ миваць.
Теда’ сэдорана’’ ӈэсындо’ еркана хардакондо’ мюй таӈго, ядемби. Хусувэй яля’ хибяхава таняна мэ. Вадини’’ поӈгана Людмила Егоровна ӈудида ни’’ хасена’’, пыда ӈухуко сэдабава’ е’’эмня таранадамда хамэдамби.
— Тад лэркабт’ ӈацекы’’ тоб’’нандо’, мале хамэдёда’’, таминда манзаина’’ пяӈгува’’, — вадамда мел’’ нями минреда. — Мань нюдякоходани’ нибям’ ня’’амбидм’. Школани’ пуд тоходанаванзь хаядамзь, тикахад пуня’ мякани’ тодамзь, сэдоралва’ мят’ еремядамзь. Си’’ми нябакоми Александра Евдокимовна Талеева тэврась, хусувэй серкана нядабасетыв. Тикахана не’’ ӈокаць, сырцетыдм’ ханзер’’ ивъер’ пени, ты’ хоб напсеты’’. Ты пэртяха’’на тарана мальци, ея сэдабасеты’’. Хибяри’’ харвабцовна сэдъи пэрцеты’’. Тарем’ янамбовна манзаям’ торомдабидамзь.
Тоб’’нани’ ӈумбъями пили’’ ха’’морцеты. Ӈарка няхатани ӈока ӈамгэм’ сэдыба тухудамзь. Вы’ тер’’ е’’эмня тобак, пиви, со’’ок, мальци, ӈоба сэдыбасетыдм’, — Людмила тензебтейдась.
Тарем’ ӈока по’’ тяхана ӈацембой неӈэ Людмила Талеева таняна ядабтавыда, теневана’’ мел’’ некоцида тенад тенейда, пыда тохолкодида — Марфа Выучейской, Мария Рубцова, Людмила Апицына. Пыдо’ нямдо’ ӈарка серт’ тэврадонзь.
— Минренами ивнани ӈа. Сэдыбадини’’ илевани’ ямбан’ си’’ми’ ӈавламби’’. Теда’ тюкохона яни’’ тер’’ тэвравы’’ манзаи сертабини’, тарабата сулортыни’. Ӈацекы’’ хэвханани’ мэсеты’’, сырцеты’’, тохолкосеты’’. Теневабцуни’ няндо’ тэврабини’. Пыдо’ ӈухуко, туцяко манзаяцеты’’.
Ӈацекы’’ пихина сидни’ ядабтабнандо’, тороватсеты’’, хонаркосеты’’: «Сяха’ мяканди’ тось серо’’ӈа?» Тикы нянани’ ӈани’ сава.
Лаханавани’ пуданахана Александра Андреевна ма’’нисяв, тюку по’ сидна’’ ервона’’ сававна нядаць, маня’’ тавы есяханандо’ пени тэмдаваць, манзаравана’’ е’’эмня таранава’’ тас.
Автор: Юлия Талеева’ падвы
Авторы
Няръяна Нгэрм
Темы