обновлено: 06:32, 19 июля 2024
Няръяна Ӈэрм
Ялян’ харванам’ - яб нёдада
Округна’’ тиӈгывна халядава’ ялям’ ядабтамбиваць. Приуральской районхы Аксарка хардахана тодо’’ яхат товы’’ ёртя’’ ӈобтикы сянакова’ ялямдо’ мэ’’ӈаць.
Время для чтения ~ 2 минуты
Хубтыхы ю’’ час’ пиркана сарё ӈэбта ӈод’’ Саля’ яв’ лаӈг’ ниня’ пирдырманда’’ мале ӈобт’ ма’’лёвыць. Нюрте’’э’ хасава’’ мотор’ ӈанохона ӈэдалёрӈаць. Юкад вата ненэця’’ сидлад’’мана нидо’ нертембиць. Пыдо’ таславы ян’ мер’ тэворпато’ тарась. Сарёхона саць ӈарка мерцяда яӈгусь, хамба’’ хасенаць. Тикы нито’ сянакодан’ лаӈг’ ядхана нердена тодабцие пятаць, мяд’’ тер’’мана халя’ евэйм’ пиремба пяць.
Тюку по’ хуркари едэй евэй пиревыць. Мал’ ӈэбто’ тикаханандо’ халя танясь. Тайбери мяд’ терха’ пирдырманди’ няю’ халядамди’ Пирця харад’ няд тэвравэхэнзь. Неюм’ ма’’нисяв, мани’ евэйханани’ ӈамгэхэрт луца ӈаварм’ нининзь моёпю’’, ихинани паромбава’ ёльцяӈгана таросяда сер’’. Виктор Перчеда Харсаим’ тер, халядана ненэця’, пыдхавада мякданда пиревандадамда тэвравысь. Мята тер’’ тодо’’ я’’амна харе’’ евэйдамдо’ пирембавыць. Хасава нюхуртада небянди’ ня’ варемди’ мэ’’мэхэ’. Тад пуна тасла Надежда Перчеда пиревым’ пирдырти’’ поӈгана сямянхат ӈавыдотаӈэ таславэдо’.
Яля’ еркана тю’’уна’ ӈока хибя’’ ма’’лыць. Таняна тарана’’ тараць, сёбар’’ харто’ тяхакуна сянакуць. Поӈганандо’ ва’’лёйвана ӈаябадм’ хырыбада’’ ӈани’ танявыць. Хасава — ханюй халяхад ӈаябадм’ есьпиць, не’’ — тандая’ ватавым’ мюлебиць. Ерводо’ сававна ёрти ненэцие ненадумдэйдонзь. Тикы’’ поӈгана мале теневана нява’’ Виктор Перчеда мэвысь. Хадӈо’’ яхананда ненэся ва’’лёй ӈэдараха.
Пирдырмахана нерня’ ха’’амвы’’ мал’ ӈуда’ тер ня’’маць. Тарем’ Хо’ саляхана халядани’’ ед’ таславы ненадо ялямдо’ мэ’’ӈадонзь.
Автор: М.Яр’ падвы
