обновлено: 03:50, 25 августа 2023
Няръяна Ӈэрм
Хубта яхад товы’’
Сёяха хардан’ тэвавани нерцю’’ таслав: выӈгана илена’’ ненэцие’’ илам’ манэ’’пани тара. Пуна харта тарем’ еремя. Ты пэрта’’ ненэця’’ сянакова’ яляхана мэ’’манда тыдо’ хосаяванда’’ ӈэвы’’.
Время для чтения ~ 4 минуты
Ӈэдалёвана’’ мальӈгана я’’авлада тецьда ялясь, ӈадьбята мядо’’мана миӈава’’. Ӈэвадёда’’ ненэця’’ тецьдандо’ помна пирдырман’ хамеку’’. Неноховавна хасава’’ тыдо тохоламби’’. Не’’ ӈод’’ нито’ хэвхана ӈани’ мэ’’. Ӈэдалёрта’’ хадридо’, тёраридо’ хан’’ӈа’’. Мерця’ сер’ сибицяко ӈамгэдарев’ пулаӈга’’. Мале сян мя’’амна хаява’’. Ханярина ӈобтикы сер’’: мал’’ тыдо’ тохоламби’’…
Ямб сехэры’ нерня’
Хардан’ хэсь ялява’’ то. Хубтахана мер’ юркына’’. Хабте’’эна’’ мят’ тэврава’’. Тадхав’ ёркола пэйна’’. Тад сырӈава’’, ӈопой вырэй ты пирин’ ладарӈа. Ладарманда малхана вадм’ тахабта, ӈани’’ няхабида пумнанда майнадрев’ сянэрць санэяд’’. Нябимдей’’ ёрколавахана ӈобкартм’ нива’’ ӈэдара’’. Вад’ мюй’’ ты’’ поӈгат самляӈг меретам’ сярава’’, ӈанина’’ хадырманзь ӈэдарэйна’’.
Ӈэдалёванда нява’’ Ӈокдэта Пэвкось. Пыда паромба тыда подерпа пя. Ханамда валӈа. Тэхэбида тюрхана на’’волпавахад ехэра’’, нерняри’ нэкалман’’ харвадо’. Ӈодь’’ хананда ни’ ӈамдхава, ты’’ ӈопой санан’ ха’’мыд’’, ӈэто’ хадри’’ хаюрӈа’’. Лабакм’ понхарт’ нидо’ сюртембю’’. Пуняю’ няватабто’ яля’ сэв’ ӈылад ӈадимда’’ то’’олха’’. Тецьдахад хаер’’ ӈобатанараха. Нум’ сёяркав хадм’ пэртарха. Сэвха’’на тэри маниебцо!
Буран’ хан’ мю’’ тына’’ пэмба пява’’. Тетӈэ ня’’амхая, тю’’у’ илабива’’. Мале мал’’ мэйнаць, лакри’ ӈопой’’ядо’ хэвня’ санэй’’. Пэвко хахая нувы, ӈэхэданда сарвахалада. Ӈули’’ тэтна еремэкэва’’. Лэракабт’ саӈона’’ няватана тэн’ ха’’амвыд’’. Ханана’’ мю’ сылына’’: хабтаркава’’ яӈгу. Ӈэдаравы тына’’ ӈани’ хосая таслэйна’’. Хунвы тэва’’ ярка тара’’нив! Сававна мовы тынзян’ минханда таркэй’’. Хубта сер’’ма’’ яӈго, ӈани’ пэӈава’’. Тедахав’ пелей’’ инядо’ серебтева’’, хуркон’ сярына’’.
Хардан’ ӈэдалыва’’
Минзь ядо’ ӈули’’ хубта, ю’’ ӈэдалава. Хардан’ яляхана тэва тара. Хадада, мерцяда ӈод’’ са’’ӈаха’. Мерета еся ханва’’ нэкалӈава’’, манзадава’’. Мимана’’ сер’ ӈоб’’ нултаӈгава’’, ханана’’ тер манэсарӈава’’. Мер’ нива’’ мий’’, ӈарка паромдэй хэрабтамбина’’. Тарем’ ӈод’’ тына’’ тэтнавы’’ ӈэӈгу’’, ховэдо’ ӈока ӈэванӈгабя. Минана’’ ед’ Окотэтто Янис’ мя’’ паллавы. Пыда ӈани’ тыда тохоламбвы. Нянана’’ ӈэдалёван харвась: ханда нись хамэдё’’. Ма’’нив: хар’’н тутадм’. Хабте’’эда ханзер’’ яланда пэмакыда?
Харад’ хэвхана ӈэда мят’ нултава’’, ненэця’’ ёрколавы’’. Тэкоцина’’ лакамбой’ няндо’ ӈэд’’яна’’. Пэдавэрхахарт’’ ниць ӈа’’, буран’ хан’ нид сана’’махадандо’, мер’ нявота хан’’ӈаць. Ӈани’ хаява’’. Хасава’’ ханодо’ подерпа хаи’’. Пунахав, харвабта, пэвсюманда ӈэсонд’ ӈэдалёрмыкы’’.
Сидя пим’ мадава’’, таддикахад Сёяха’ тер’’ ӈобт’ ма’’лы’’. Ханяӈы’’ яля’ сэв юркавам’ нертемба тэхэ’’на ӈэдалё товы’’. Тикахавад ханярид тарцяри вадари’’ со’’: «Пэйна’’? Пэйно’’!» Таӈгун ян’ тыдо’ минре’’махадандо’ ӈэдалёрта’’ варедо’ мэ’’ӈаць. Хусувэндо’ ты’’ мере’’ӈаць. Сяхаринда сямянхат ва’’лёй таня пэрӈа. Няхатата мерета Аркадий Ӈокдэтась. Пыда ӈобтарем’ тыда пэмба тавыда, 300 пир’’ километрм’ пирдалевы’’.
Анна Яптик’ падвы
