обновлено: 06:26, 28 апреля 2023
Няръяна Ӈэрм
Хадамдо’ нидо’ юрыбю’’
Маня’’ яханана’’ ӈока сава вадам’ намдуванда’’ хибярина’’ хусувэй ӈэсыхына иле’’. Тюку яхана соявы’’, вадёданавы’’, илевандо’ ямбан’ харто’ яханандо’ манзаравы’’. Тарця нина’’ Нельмин Саляхана ӈод’’ тянё вуни’’ ӈа’’. Ӈопойдо’ Мария Егоровна Лаптандер.
Время для чтения ~ 3 минуты
Мэта ирийна’’ самлязимдей яӈганя толыркана Саляхана илена’’ нина’’ ӈарка ялям’ мэ’’ӈаць. Тамальӈгана ӈэсыхынандо’ илена’’ поӈгана сямян ӈармбэй няндо’ хасуюр’’ си’’ив пом’ ядабтамбиць. Мария Егоровна Лаптандер’ мят’ мядонда’’ турӈаць. Сава вади мэ’’манзь Малоземельской Советхана манзарана’’, Совет ветеранов манзаям’ пэртя’’ турӈаць, нюда, нюта ню’’, перенида хэвхананда мэць.
Мария Егоровна илеванда ямбан’ ӈока ӈамгэм’ манэ’’мы’’. Харта иле’’мямда тарем’ ваде’’ӈада:
— Небяв мер’ яӈгумась. Нисями’ си’’ми вадась, хусувэй тарана серт’ тохолась. Пыда пон’ хэвханан илесь, си’’ив ю’’ няхар’’ похонанда яӈгумась. Пили’’ хойхана илеваць, тэхэ’’на мэваць. Нюдякоходан’ сэдорась тухудамзь, си’’ми нябав’ хусувэй не’’ манзаи пэрць тохолась. Тикахад илеван’ ямбан’ сэдорадм’, хусувэй таранам’ сэдаӈгудм’. Не нюни’’ ӈани’ сававна сэдорана’’. Мань тохолавын. Невхэна ӈока манзараваць. Война’ мальӈгана хасава’’ мал’’ хаяць. Не’’, пухуця’’, ӈацекы’’ хаиць, хусувэй манзаи пэрӈаць. Мань тэхэ’’на мэсетыдм’, ханяна ӈопойриӈэ хэсетыдм’. Сеюв’ пинсеты, война’ похо’’на ӈылека’’ ӈокаць. Тына’’ маниесетына’’, ханя’ хантан? Пинаӈгун’, ӈоб’ нерня’ пэртар. Та’ сенокосхана манзарасетыва’’, хоровина’’ таняць. Ханзер’’ пир’’ӈава’’, тарем’ илеваць. Война’ пуд хаюпа хаядм’, вэсаков’ тэхэ’’на мэнась. Си’’ив нюми’ ваданинзь. Со’’ илеваць. Теда’ ӈод’’ — саво. Хасава нюв’, не нюн’ ню тэхэ’’на мэӈаха’.
Мария Егоровна Нюдя яхана 1926 по’ ты’’ ниць ирий еркы яляхана соявы, мал’’ нида тэхэ’’на мэна хибяриць. Пыда ӈод’’ тэхэ’’на мэвы. Киров нюбета колхозхана ӈацекэӈэ манзарась пядась, тикахад Выучейской колхозхана вэсаконда ня’ тэхэ’’на мэвэхэнзь. Ӈарка хибяриӈэ хэсь, Мария Егоровна Салян’ хардан’ ха’’мыць, теда’ таняна илевамда мэ’’ӈада. Ныхында пирувна мята тер нядаби, сава вадам’ хэтвада нита ихина сава ӈэсеты. Нянда турта нида маймбась ядабтамбасетыда.
Пудана’’ похо’’на со’’яма’ яляханда нида ӈарка вади хэтуванзь тэворцеты’’, мядонзэйсавэй’’ Саляхана манзарана’’ ерводо’ тюӈгасеты’’.
Мария Егоровна Лаптандер илеванда ямбан’ сертавэда мале ӈока. Тикым’ ӈэсындо’ тер’’ тенедо’, со’’яма’ яляхананда нянда ӈарка вадам’ хэтаць.
Тад нерня’ ӈод’’, хадана’’ илевада сававна миӈая, нядаӈгодида пилибт’ таняя’’, маям’ ехэрась илевамда мэ’’ӈамда. Сенз ӈэя, хусувэй товы ялян’ маймбая.
Юлия Талеева’ падвы
