Няръяна Ӈэрм
Ӈани’ сянакуць
Ты’’ саполана ирийхана «Илебц» нюбета театр хэбидя яляханандо’ ӈани’ ненэцие ма’’лась. Тодо’’ тэнз’’ ила саирм’ харвабтана хибяри’’ «Предание тундры» спектакльм’ манэ’’ӈаць.
Время для чтения ~ 3 минуты
Маня’’ нина’’ сянаковамдо’ ёльце пон минредо’. Тикава’’ Прокопий Явтысойхад миӈа, пыда няданда манзаямдо’ нерня’ тидхалембидо’. Паднана нява’’ нердена нерм’ пэртяӈэ тарась. Театр’ ӈадимдева — ӈопой сер’’, тикым нерня’ лэтрась тара нив’’. Тюку яля’ Прокопий Андреевич’ ӈадимдевы тенад иле.
Ӈока по’’ тяхана паднана нямдо’ нядабавы’’ тянё ниць ӈа’’, вадамдо’, иландо’ саирм, хой’ илм’ теневанаць. Тарця ва’’лёй ненэця’’ театрхана сянакодаӈэ тоць. Прокопий Явтысой’ пьесавна «Пензер» спектакльм’ нюртей мэва’ сертаць. Ненэця’’ ханзер’’ ӈэрм’ яхана советской власть’ товам’ манэ’’ӈаць. Хурка несэй иланд’ хойхана мюсерта’’ ха’’амвыд’’, ханзер’’ иландо’ несэймы, мал’ манэ’’мыдо’. Нердена режиссёрӈэ Любовь Лебедева таравысь. Тарем’, янамбовна нерняри’ миӈаць. Тикахад ненэцие’’ вадако’’мана хамадавы «Тундровые были» пьеса ӈадимясь. «Илебц» театр’ тер’’ вадава’’ лэтрамба ёльце ӈарка серм’ минре. Сиддо’ няд’’мяць ӈацекы’’ вадамдо’ намдорӈа’’.
«Илебц» мале сидя ю’’ сиднтет по’’ ямбан’ манзара. Сянакода не’’, хасава’’ ненэй артист’’ тотрев’ тара’’, хыноӈа’’, вадидо’ мэ’’ӈа’’. Пыдо’ хамадавыдо’ сянмэвна маниеӈгуд, тарем’ ӈод’’ несэйраха’’ ӈэсеты’’. Сяхаринда ил’ ватом’ манэ’’лабтамби’’, тикыдо’ ненэй илаӈгад миӈа’’. Таняна сянакода’’ хибяри’’ хусувэй мэва’ несэймдана’’. Нертейӈэ сянаковы’’ ню’’, нюто’ ню’’ теда’ таняна сянаку’’.
Серото’ поӈгана сём’ ханасеты’’, вадаком’ вадецеты’’, нюдо’ вадабасеты’’. Хой’ тер’’ ненэця’’ поӈгнандо’ сававна илесеты’’, тоенана по’’ мальӈгана нидо’ нядабасеты’’.
Нина’’ сертавэдо’ ӈока, сянаковамдо’ ӈатенадо’ ӈани’ ӈока. Таӈок по’’ ямбан’ маня’’ артистана’’’ хуркари ё’’ сюртець, ханярина мэць — округманана’’ ӈэдалёрӈаць, ӈарка март’ тэворӈаць. Финляндияхана, Голландияхана, Норвегияхана мэць, хуркари’’ фестивалька’’ тэворӈаць. Ярославль маркана «Охочие комедианты» фольклорм’ минрена’’ театр’ фестивалькана мэць, сидя ненадумда’’мам’ тэвраць.
Пудана’’ похо’’на няндо’ едэй хибяри’’ сянакованзь тэворӈа’’’. Манзаядо’ пили’’ савумдана’’.
Автор: Юлия Талеева’ падвы
Авторы
Няръяна Нгэрм
Темы