обновлено: 06:06, 02 февраля 2023
Няръяна Ӈэрм
Каԓитуӈ патԓу ӈэта”
Шаӈок каԓи» катаметуӈ патԓотоӈ манԓе мимытуӈ. Пюԓ дяхана непой похона традиционное рыболовстваӈ дет кашаԓи дюԓ неша» квотатоӈ патмай» — детхятун каԓятатуӈ катамантуӈ мэты.
Ӈопшеԓы выӈкна диԓина» нешаӈи» мат’ дю» хампԓяӈк тонна ӈок каԓям детхятоӈ катамай». Каԓи» катамаӈ дет ӈайта квотаӈ патԓу пытыпёма –потахана тадяӈайта шеԓ. Ԓусан патаԓкана традиционное рыболовстваӈ дет тонԓюта — ненэй неша», капи», вахандя капи».
Таԓьша ӈяпта ӈотнан пытуӈ ӈотнаӈ хямдет ӈукамана каԓям ништу ката». Ӈупчики дяку», токуши» ԓэтпёмаӈ дет тасԓамы» тапяку» нётаматуӈ таԓа. Выӈкна диԓина» неша» мятутуӈ кявхана ӈайта дякохона, токушахана каԓиташту». Чуки похона Пюԓ дяхана ӈайта Неԓм’ чеԓ» нешади» дет тонԓюта управленихина мансԓанна» выӈкна диԓина» нешаӈкат манԓе дюԓкат ва᾿та мат заявкам няамӈаш» –таӈок неша» каԓитуӈ патаԓ патӈаш». Квотетуӈ патаԓ Хаԓяӈкаԓтыхит топ, чикиминхантуӈ нешаде» конԓандятуӈ. Таԓьша патаԓ няаммахататоӈ выӈкна диԓина неша» шан ниш пин каԓиташтоны.
Лариса Айваседо патмы
