обновлено: 06:55, 13 февраля 2023
Няръяна Ӈэрм
Деты патаԓ няамӈа
«Верхне — Пуровский» совхоз’ чонь мякна ватапëчита» хыльмику» дет патаԓ — товарный знак «Ямальский соболь» няамӈаш. Татнеԓьняӈ хыльмикута коп» совхоз’ чикиманта мичиԓпëтдята. Таԓкахана хыльмику» хампԓяӈк’дяӈкня поӈ чета ватапёнԓдятоньш.
Таԓкахай совхоз’ чонь мякна непоӈ, кынԓаш чепьмантуӈ неԓьня, хыльмикатоӈ чет дëнаԓ ӈокаш. Четаӈ ӈуп дёнаԓкат ва’та шеэв дюԓ халаку» ватапи», ӈыдитоӈ кыԓамайтуӈ. Чики» халакутоӈ таӈок по» дямпан чешча дяхана диԓе» манԓе тохоӈа». Куԓкаԓи вайма нумкна ништут кыниԓи. Чешчахана кыниԓемантуӈ тайхана, хыльмикатуӈ диԓишат мято» тонԓхана хапхадя хомана хынԓуԓьштутуӈ.
Анастасия Айваседо шитчет’дяӈкня похот ӈука поӈ чонь» мякна мансԓаӈа. Непоӈ хомана мансԓаманта деэмня шита зверофермаӈ бригадирӈя мэӈаш. Маньшту хыльмикатоӈ шича мэмаӈ ӈамԓаштутуӈ. Халакутуӈ ӈамаԓ витаминхана тахаԓаштутуӈ, таԓям хыльмикатоӈ деняԓ ништу» канэԓ, коптуӈ хома ӈяшту».
Халакутуӈ копы» наӈича каԓват няӈа выставкахана миԓташтутуӈ. Чикехет кадючетоӈ швейный фабрикаха» ӈайтапташтутуӈ таньняна шуба паныӈяш хятмантуӈ мэт. Совхоз’ тэта Надир Гаджиев маньшту, маня» халаку”на копа» мыдю», таԓитуӈ дёԓя».
Таԓям Пюԓ дяхана вачумы хыльмику» копы» таԓьшан ха᾿та ваташипёй тэмташтутуӈ. Совхозхана хыльмик копахаты куԓкаԓи» паныдю» хайташту», шомя, ӈопа — таԓьш шеԓташту».
Чикитоӈ каԓьтуӈ лапкахататуӈ мичиԓпёштутуӈ. Четаӈ товарный знак «Ямальский соболь» няаммахататоӈ совхозхана шеԓтамайтуӈ ӈамыкутоӈ неньшаԓмана чикимантуӈ тэмтаԓаштондятуӈ. Халакутуӈ копа» хома ӈаймя, хыльмикатуӈ хомана, дечашипёй вачутама», чонь мякна мансԓанна”хат ӈа. Пытоӈ пон мансдямтоӈ хомана минԓештутуӈ». Хыльмику» падиԓта» ӈуп’ вин камоԓьш мансԓашту».
Лариса Айваседо патмы, таттама пыта таттамыта
