обновлено: 08:18, 02 февраля 2023
Лух Авт
Сургутской хантэт уӆапса ванан тайты питса
Хут таӆ сайн Сургутской госуниверситетан сургутской хантэт уӆапса нох аӆамты кеша Научно-практической центр пуншман уса.
Щи онтасан Ямал па Югра округатан хаӆэват пелакан уӆты хантэт ясаң па уӆапса нох аӆамман тайты питӆа. Там хатӆатан грамматической словарь сургутской хантэт ураңан ӆэщатӆа. Электронной ресурс мохты щи вер ищи шеңк такан тайӆа. Сургутской госуниверситетан тайты ӆуңтапат ямас ӆэщатӆайт па интернет мохты мира альӆайт.
Там хатӆатан Ямал па Югра муватан кат ханты ясңаң газет этлийӆ. Ямалан — ӆорвош па приуральской диалектатан потрат этлиӆат. Нумасӆув Ноябрьск па Муравленко вошатан уӆты хантыӆув кеша «ӅУХ АВТ» ӆуңатты щира верты, щи веран сургутской диалектан лопас этлиты питаӆ. Югра муван ин «Ханты ясаң» туп казымской диалектан ханшман уӆӆа. Там еӆпи таӆатан сургутской хантэт потрапсайн ищи этлийс, туп ин ханшты хоят антом.
Нумастэман, там вер ванан тайты питам онтасан, сургутской хантэт ӆув рут ясңеӆ ищи ванан па нох аӆамман тайты питӆэӆ.
