обновлено: 05:49, 17 февраля 2023
Лух Авт
Еӆта ёхтам хоятата Ӆорвош район уӆапсаев альӆэв
Стоповер — щит яӆап мутра, хун йи вош эӆты кимет воша манты порайн, 2-3 щёс кем эӆты таӆаң хатӆ унты тохӆаң хоп хуӆмет вошан хойӆыйӆ. Манты нэпек хоща тынаӆ тынаңа ант йиӆ.
Щимащ вер Пулңават вошан верса. Ун вошат кутан яңхты тохӆаң хопат муң хощаев щутщаты ӆатӆат. Манты хоятат щи куман Пулңават вош вантӆат, Канащ курта, вуӆы хота тутӆыӆайт, Овс мув ӆэтот ӆутты па ӆэты яңхӆат.
Ӆорвош районан щимащ ун тохӆаң хопат ант яңхӆат. Еӆта яңхты хоятат ищи па шоши мувев вантты ӆаңхаӆайт. Щит ураңан ЦРПТ «Земля Лугуя» Ӆорвош район куртаң хоятӆаӆ пиӆан арсыр шушты юшат нэпека ханшсат па еӆӆы вер верты щира грант ох шитсат. Муйкем район мувев ай ат уӆ, камн каш верты, мув па пормас вантты верат ищи тайӆув.
Таӆан, машинайн манты порайн, ӆуңан па, йиңк хуват тутаң хопатан яңхман, Муши вошан па моӆты ай куртатан хойӆыты рахаӆ. Йис пора уӆапса вантты, веӆпасӆаты пормасат ёша вуйӆыты. Ханты, саран сох нох ӆуматты па хор вуты, хоӆап вантты, няшиӆыты. Таӆан рэп эӆты хатэмиты, омлэп эӆты йиңк аӆты. Камн хорпи ар вер па пормас альты рахаӆ. Ата хащты хоятат вуӆы па паварт хотан хоӆты ураңан оӆтахайт ӆэщатман уӆӆат.
Ӆапат кема ёхтыӆыты хоятат Кушавт курта яңхты верытӆат, ханты уӆапса вантты. Горка вошан лыптаң эпӆаң шай йинщты хота ӆоңематы. Ай вош ёхан пеӆа, Варчато ӆоран хуӆ веӆпасӆаты. Щаня ёханан ханты куртат вантты па хуӆ веӆпасӆаты ёх хоща яңхты. Яӆап Кевавтан катра хотат, йис пора эӆты энамты нохар юхат вантты, нохар акатты, ваншең курт хуват шушиӆыты. Ханты-Мушийн «Живун» природно-этнографической парк-музей хоща хатӆ сыс ищи арсыр ёнтопсайт хоятат кеша верӆайт, пормасат па хотат алиӆыӆайт.
Мойң хоятат тумпийн куртаң мохет ищи каш тайӆат щимащ юшат хуват шушиӆыты. ЦРПТ «Земля Лугуя» щи вер нумасман тайӆаӆӆы. «Ямальской долголетие» проект хуват пиращ хоятат щутщаты хатӆатан тохи тутӆыӆайт.
«Ӆорвош района мохты ар хоят ант куш ёхатаӆ. Туп там мув ищи ар хорам щуңат, тэӆые умащ вантты тахайт, вантопсайт тайӆ. Атэӆ ёхтыӆыты хоятат пиӆан рахаӆ рупитты. Ияха пиӆтащты щирн, уӆты хоятат па куща ёх, верты верэв еӆ хатмаӆ па ун вошат кеман ёӆта ант хащаӆ», — округ куща ху Дмитрий Артюхов ёхтыӆымаӆ порайн ястас.
Зоя Куртямова ханшам потар
