Лух Авт
Хоятат пиӆан рупитты нэ мойӆаптаса
Хасям ӆапатан Хон мув кусяев Владимир Владимирович Путин, Ӆорвош районан социальной службайн рупитты нэ Мария Владимировна Пуйко, «Заслуженный работник местного самоуправления» нэман юкатсаӆӆы.
Мария Владимировна хоятат пиӆан рупитаӆ. Рупатайӆ шеңк яма уятӆаӆӆы. Хоятат пеӆа шеңк самаң. Ӆувеӆ уятты хоятат, ӆув эӆтайӆ туп ям ясңат ястаӆат. Хун ма ӆув пиӆэӆан потартсам па моштасэм, муй хорпи ӆув вещкат хоят.
Потармеман порайн, рупатайӆ эӆты каматса ясаң ястас: «Социальной защитайн хольмаң таӆ рупитӆам. Аӆ специалиста усам. 2010-мет таӆ эӆты департамент куся нэңа уӆӆам.
Аңкем — Елена Васильевна, асем — Владимир Яковлевич Коневңан, Муши вош эӆты, саранңан. Аңкем аси Саран мув эӆты. Семьяеван вет няврэм усув. Айтэӆан рупатая утаӆтысаюв, аңкева-асева нётсув. Яма рупитты утаӆтысаюв, хоятат пеӆа яма уӆты. Мосаң сишан ма симась рупата пирысам, хоятата нётты.
Рупатаем самаңа тайӆэм. Ма пиӆэман шеңк ям хоятат рупитӆат, рупатаеӆ уятӆат. Кашң таӆ ай куртата яңхӆам, хоятат пиӆан уйтантыӆам. Потрэмиӆув, муй инсясапсайт тайӆат — инсясӆат. Мосты нэпекат ӆэсятты нётӆув. Муши вошан ма рупитты тахаема кашң хоят ёхатты верытаӆ, кашң хоята нётӆув. Ин СВО хося уӆты хоятат рутӆаӆ пиӆан рупитӆув. Сит воӆаң вер, ӆувиӆаӆа нётты».
Симась си, Мария Владимировна хорпи веськат, самаң хоятат хоятӆув пиӆан рупитты верэӆ уӆ. Кашң аӆ хоят симась тахая ант паӆтаман яңхты верытаӆ, инсясты, моӆты нётапса мосаӆ ки, ӆэрапты.
Альбина Тырлина ханшам потар
Авторы
Лух Авт
Темы